Nongpoh, Rymphang 26: Hynriew ngut ki briew kiba dei ki riewniam ka Balang Catholic kynthup u Phadar, Brother bad ki Sister, kila iap hashen ha ka jingjia aksiden kali kaba jia hynne ka janmiet sngi U Blei ha ka Shnong Sumer Umbang hapdeng kawei ka trok 12 shaka bad kawei ka Bolero.
Kine kiba iap ki dei kiba shong ha ka bolero kaba dang wan kiew sha Shillong bad napdeng kine, lai ngut ki dei ki Kynthei bad lai ngut ki dei ki Shynrang. Kane ka jingjia kala jia ha ka por 2 baje janmiet eiei.
Kat kum ka khubor Pulit, kane ka trok 12 shaka ba don u nombor WB41-G-7268, ka dei kaba kit dewbilat bad kaba dang hiar sha Assam. Ka Bolero ka dei kaba don u nombor AS26-B-7908 kaba dang wan kiew na Assam sha Shillong bad la pyntip ba kane ka Bolero ka dei kaba la register ha ka kyrteng jong ka Dioceses ka Bongaigoan, Assam bad kitei kiba khlad ki dei ki Sister, Brother bad u Father.
Ki Pulit ki iathuh ba ka aksiden kala jia namar ka jingpynher sted palat jong u nongniah ka trok 12 shaka. Ki ong ba haba poi ha khongdong jong ka Sumer Umbang, u nongniah um shym la lah tehlakam shuh ia ka kali bad ula leit tur sha ka phang jong ka surok ba wan kiew shaneng bad leit tynrah beit beit ia ka Bolero kaba dang kiew sha Shillong.
Ki iathuh ba ha kane ka jingjia, u nongniah bad u nongbud jong kane ka trok kila mynsaw jur bad la pynkit noh mar mar ia ki sha Shillong Civil Hospital ban ioh ia ka jingsumar.
Ka jingtohkit mynta kala iaid shakhmat.
U Thomas Pulloppilil Bishop ka Bongaigoan Diocese, u pyntip ba kine ki iap aksiden kali ki kynthup ia u Parish Priest ka Barama Parish Fr. Mathew Das, lai ngut ki sister ka Barama bad Baganpara ba kyrteng ka Sis Melgarine Dantes, Promila Tirker bad Rossie Nongrum, uwei u Nonghikai ka skul Barama St John HS School ba kyrteng u Mairang bad u Nongniah kali.
