Tura, Rymphang 26 : Ka jingpeit pyrman jong ki paidbah ba pyrshah ia ka jingthied vote ha Ri-lum Garo, kala lam sha ka jingiohkem ia ka kynhun ki Nongkyrshan u kyrtong ka BJP na Dalu Akki A Sangma lem bad ia u President ka kynhun Seng bhalang ADE kiba sam pisa ha kane ka constituency tang mar syn kut ka por ialap elekshon.
Ki paidbah kila kem ia kine ki nongkyrshan ka BJP ha ka por ba ki dang thmu ban rung sha kawei ka shnong ha Dalu constituency hynnin ka miet wat hapdeng ka hukum ba pyrrkhing jong ka Election Commission ban leh ia kino kino ki kam hadien ka jingialap elekshon ba kut ha ka por 4 baje janmiet.
Ki paidbah kila ioh ban kurup haduh T. 174360 tyngka ka pisa na kine ki kynhun nongkyrshan ka BJP. La kynnoh ba kine ki Nongkyrshan ka BJP kila pyrshang ban thied ia ki paidbah da ka pisa ba kin ai ia ka vote jong ki sha u kyrtong ka BJP.
Ki paidbah ka Tura ruh hynnin ka miet kila bat ia artylli ki kali kiba thmu ban rung shnong bad kila ioh bat ia u President ka Association for Democracy & Empowerment (ADE) u Dalseng Bira Ch Momin bad na une u nongalam ka ADE, ki paidbah kila ioh ban kurup ia ka pisa ba T.32,000.
Kat kum ka khubor Pulit, ki paidbah kila ioh ban kurup T. 174360 ka pisa na ka kti jong u Dikan Marak ban a K. A. Road, Tura, Jepan Marak na Kujikura PS Dalu bad Kambe M Marak ba na Mangkengre.
Ia kine ki briew la aiti noh sha ki Pulit bad sha ka Static Surveillance Team jong ka Election Commission ha kane hi kajuh ka miet.
