Shillong, Rymphang 23: Ka seng Bharatiya Janata Party hynne ka sngi, kala ong ba ka All India Trinamool Congress ka kwah ban wanrah da ka raibi bamsap ha ka jylla katba ka National People’s Party pat ka kwah ban pyntreikam iaka kam buit tuh ha ki kam thungkam sorkar.
Haba iakren bad ki nongpathai khubor, u Nongaiktien ka BJP u Bah Mariahom Kharkrang ula ong, ka seng na West Bengal ka kren ban aikam haduh 3 lak ngut ki samla bad ban ai iaka jingiarap iaki samla hynrei la lap noh ba ka don ka jyrsieh ha ka West Bengal School Service Commission.
“Katei ka jyrsieh kadei halor ka jingthungkam be-ain ia ki nonghikai bad ia kiwei pat ki bym don bynta ha ka kam hikai ha ki skul ha Bengal. Ia kane lah ban ong ba kadei ka TMC’s Flagship model of employment. Hato ngi kwah ba kum.kane kanrikom treikam ha Meghalaya?” la buh jingkylli u Bah Kharkrang.
Une u kyrtong ka North Shillong ba ki polisi treikam kiba dei da ka jingthmu ban kyntiew ia ka jinglong jingman jong ki briew kiba duk lyngba ka MNREGA, hynrei kala don ka jingjyllei jong ka bamsap ha ka jylla kaba synshar ka TMC, ha kaba la bthah ia ki BDO ba kin lum da ka pisa ha kaban ai iaka Job Card.
“ia ki Supervisors jongka MNREGA scheme la thung da ki nongmihkhmat jongka TMC lyngba ki ophis jongki BDO ia kaba la pynkhamti ha ki ban lum pisa be-ain. Ki nongioh jingmyntoi ki bym lah ban siew ia ka pisa ki shah khanglad noh ban ioh iaki job card,” ong u Bah Kharkrang bad ka bynrap, “Kane kadei ka kolshor bamsap kaba TMC ka thmu ban wanrah ha ka jylla Meghalaya”.
Ula ong, ka iingkashari ha ka sngi Balang kala kyntait iaka jingpan Jamin jong ka kurim bad u khun jong u MLA ka TMC u
Manik Bhattacharya, uba long u President barim jongka West Bengal Board of Primary Education.
Ia kitei ki arngut la phah noh iaki ban shah tohkit ne Judicial Custody. Ka long kaba eh ban sngewthuh kaba kumno ka kam bamsap la pyniaid da ki bahaiing bahasem kiba pyniaid iaka seng.
U Manik u don hapdeng ka jingshah tohkit ha kaba iadei bad ka jingpyndonkam bakla iaka bor ha kaban thungkam ha ki skul Primary kiba iarap da ka sorkar.
Une u ophisar IPS uba lanshongthait na ka kam, ula ther ruh ia ki nongialam ka TMC kiba pulom ha kaban weng iaka jingkhang tih dewiong ha ka por ba ki dang don ha ka seng Congress.
“U dewiong udei u marpoh khyndew uba kongsan ha kaban aikam aijam ia ki nongthep vote ka Meghalaya, hynrei kala shu sahkut beit kum kata kaba shah khang pyrshah ban tih dewiong naduh ka jingsynshar ka Congress. Kane ka kynhun jong ka seng TMC kadei ka bym don satia ia ki nongialam kiba tbit kiba dei kiba don naduh ka por ba synshar ka Congress bad hato kila ju pyrshang thikna ban pynbeit ia ka jingeh ha kaba iadei bad ka ishu Dewiong? la buh jingkylli u Bah Kharkrang.
“Ki nongialam ka TMC ha Meghalaya kidei ki juh ki riewsniew kiba pyniaid iaka sorkar Meghalaya 8 snem mynshwa kata hashwa u snem 2018 bad kim shim la leh eiei ban thaw ia ki lad ki lynti ban aikam aijam bad mynta ki sdang ban pynbiej ia ki nongthep vote ban ioh sa 5 snem ban lehkai bad ka lawei jongka Meghalaya,” ula ong.
Ula kynthoh ba ka TMC kala ai ia ki jingkular thok ha kaba iadei bad ka
West Bengal Student Credit Card Scheme.
U Bah Kharkrang ula ong, ka Student Credit Card Scheme kadei ka jingkular shwa ka elekshon na ka bynta ki khynnah kiba shong ha ka klas X, ba kin ioh ei iaka ram haduh T.10 Lak ba kin bteng ia ka jingpule ka jongki ha kaba kin hap ban siew ia ka sut ha ka dor kaba rit, hynrei ka sorkar kala pulom noh ha kaban pyntreikam pura ia katei ka skhim.
Ula ong, ka sorkar jylla kala ioh pdiang iaki aplikeshon na ki 1,12,745 ngut hynrei la mang tang na ka bynta ki 20000 ngut bad tang kumba 3000 ngut ki samla kila ioh iaki Credit Card kaba long tang 3% ha ka jylla baroh kawei.
“Ki bor sorkar ha West Bengal la tip kum kita kiba pan ia ki kot ki sla ki bym donkam tanban ioh daw ban kyntait na ki nongaplai. Bun na kiba shah jied kila ioh tang iaka Provisional Status. Kim shim la ioh satia iaka iaka Approval Letter na ki bor ba dei khmih. Ka sorkar jylla kala pulom ha kaban weng ia katei ka jingeh” ong u Bah Kharkrang bad ka kynthoh ba ka Meghalaya Youth Employment (MYE) Card jongka TMC kadei ka jingkyrmen bad ka jingkular thok ban pynbiej bad pynthame ia ki nongthep vote ka Meghalaya kumba kila leh ia ki nongthep vote ha West Bengal.
Une u kyrtong ka BJPbula ther ruh iaka NPP kaba la kular ban aikam ia ki 5 lak ngut ki samla.
Ula ong, ka don ka jingsngew jong kiba bun ba hap ban don iaka jingiadei kaba jan bad ki nongialam ka NPP ban ioh ia ka kam sorkar bad bun na ki samla kila mih noh na ka jylla ban leit wad ia ki kam kiba bha shabar ka jylla.
“Ka NPP ka kular ban aikam ia 5 Lak ngut ha ka samoi ban wan, kumba kamkular ha ki 5 snem kiba la dep bad ha ki 5 snem kiban wan yn iohi ba kiba bun ki kam sorkar kin sah thylli, hynrei ha kitei ki kam la thung pat da ki bahaiing bahasem jong ki nongialam ka NPP bad ki MLA ka NPP” ong u Bah Kharkrang.
“Kam don kano kano ka jingiapher hapdeng TMC bad ka NPP ha kaba iadei bad ka rukom thungkam ha ki kam sorkar da ka lynti ka bym dei. Ki tyrwa ban aikam da ki lak ngut ia ki samla khlem kam ka Meghalaya. Ka jinglehrain kaba khraw ia ki katto katne ngut ki nongialam” ong u Kyrtong ka BJP.
U Bah Kharkrang ula ong, lada ka wan ka BJP ha ka bor kin thaw bad pynkhlain ia ka Meghalaya Combined Recruitment Commission kaban ym don kano kano ka jinginterbiw ha ki kyrdan Grade III & IV ban pynsted ha kaban thung ia ki kam kiba lait bad ban pynduhjait ia ki kam bamsap ha ki tnad sorkar bapher.
“Ngi ngin thaw iaki lad aikam na ka bynta ki 3.5 lakh ngutha ki 5 snem ban wan, yn buh ruh artylli ki SEZ bad kawei ka IT Park. Ka kam jngohkai kadei ka lad kaba biang bha ia ka jylla bad da ki jingkyrkhu u Myntri Rangbahduh ka ri u Narendra Modi, yn bei tyngka haduh 1000 Klur ha ka kam jngohkai ha kylleng ka jylla bad yn thaw lad ban aikam kumba 1 Lak ngut ha ka liang ka kam jngohkai” ula ong.
