Nongpoh, Rymphang 23: U MLA barim ka Nongpoh Bah Mayralborn Syiem uba dei u kyrtong ka UDP ha kane ka elekshon MLA, ula jaw ummat haba kynmaw ia ki kam kiba ula lah ban pynurlong khamtam ia ki kam kiba la angnud da u Myntri Rangbah barim ka Jylla Dr DD Lapang.
Une u MLA barim jong ka Congress, ula jaw ummat katba u dang ha ka rynsan ialap elekshon hynne ka sngi ha Nongpoh, haba u kynmaw ba ula lahban pynioh ia ka Northern Ri-Bhoi College kaba la angnud la slem bah da u Dr Lapang.
U Bah Mayral Born Syiem, u la ong ba watla u Maheh Lapang u la leit sha kawei pat ka Party hynrei u sngewieid bad kynmaw burom ia u Maheh Lapang ba u la long u nongkyrshan u ba rat bah ia u bad iaka Ribhoi Baroh kawei. U la khublei ruh ia u Maheh D.D Lapang ba un nang shait nangkhlaiñ bad ruh ban nang iohi iaki sngi ban sakhi ïa ka jingkiew jong ki nongialam kiba u la sei.
U la ong ruh ba ia u Surok Nongpoh-Umden-Sonapur la dei ban ioh naduh u snem 2022 bad la dei ban ïoh ia ka jingbei tyngka naka world bank hynrei la shu pynsahkut noh bad don ki diengpynkiang kiba la shu khanglad ki bym ailad ïa u ban pynurlong ïa kane ka jingdonkam kaba khraw eh jong u paidbah.
Shuh shuh ruh, kum u Nongmihkhmat haki 5 snem ba la leit u la ïoh ban wan rah shibun ki jingmyntoi hapoh ka constituency, haba iadei bad ka umbam umdih u la ïoh ban wan rah daka Nongpoh Greater Water Supply Scheme kaba 103 klur tyngka ka ban sam iaka umbam umdih haduh 16 tylli ki shnong kiba hap hapoh ka Nongpoh Constituency bad kynthup 4 tylli ki shnong kiba hap ha Umsning Constituency. Shuh shuh kiwei kiwei ki jingmyntoi kiba u la wanrah kiba kynthup naduh ki jaka pule puthhi, jaka ai jingsumar iaki ba pang bad kiwei kiwei.
Ia kane ka jingialap elekshon la pynsdang da ka rally kaba naduh 20 Mer ter ter shaduh ka shnong Umden bad la sakhi ia ka jingiashimbynta ki Nongkyrshan ha ryngkat daki spah tylli ki Bike, Scooty, ki kali kiba kynthup naduh ki kali heh haduh ki kali rit.
