Guwahati, Rymphang 07:Hadien ba ka jingkhynra halor ki kam pyniathoh shongkurim khynnah (child marriage) kala bteng ha baroh ki bynta jong ka Assam, ki khana jong ka jingeh jingkynjar bad ka jingkyrduh ki la mih hapdeng kiba bun ki longiing.
Ha kawei na kiba kum kine ki jingjia, kawei ka longkmie bad ka pyrsa kurim kiba shong ba sah ha Fakirganj hapoh Dhubri district ka Assam ki la shah pynbor ban mih na la ka jong ka iing bad ban leit khrong namar u nongbsa ba marwei jong ka longiing u la shah kem bad shah set noh ha ki pulit.
U khun jong kane ka longkmie u la shah kem noh halor ka case kaba iadei bad ka kam pyniathoh shongkurim khynnah, ka jingjia kaba la wanrah ka jingeh ia baroh kawei ka longiing.
Kane ka jingeh kaba kane ka longiing ka la mad ka la pynphaikhmat ruh ia kiba bun ki paidbah namar ki don bun bah ki longiing kiba ki nongbsa kila shah kem oh hadien ka hukum ba la pynmih da u Myntri Rangbah (CM) ka jylla u Himanta Biswa Sarma ban kem naphang ia kiba donkti ha ka kam pyniathoh shongkurim khynnah.
“Nga kyntu ia ka sorkar, u kurim jong ka u dei uba pang bampong (cancer), ym don shuh ki ban kamai hapoh ka iing ka sem.Ngim don jingbam ban bam.Ngi dei ki briew kiba duk.Da kaba pan jingiarap na ka sorkar ngi kyrpad ia u CM ka Assam ban pyllait noh ia kine ki briew kiba la shah kem.Naduh mynta kin ym don shuh ki kam pyniathoh shongkurim ia kiba dang khynnah rta.Ngim don shuh ka bam ka dih, ym don ba wan ban iarap wat ki briew jong ki MLA,” ong uwei na ki khun jong kawei ka longiing kaba la mad ia kane ka jingeh.
Ka jingkhynra jong ka sorkar ban khanglad ia ka kam pyniathoh shongkurim khynnah ka la wanrah ka jingklumar jingmut ia kiba bun bah ki rangbah, kaba kynthup ia ki khun shynrang, ki pyrsa, shynrang, ki pyrsa kurim, ki hymmen ki para shynrang namar ka jingshah kem halor ki kam iathoh shongkurim khynnah.
Ka Dhubri district ka la sakhi halor ka jingshah kem noh jong ki 126 ngut ki briew namar ka kam pyniathoh shongkurim khynnah, bad haduh kumba 111 ngut kila shah set phatok.
Baroh ki la don haduh 2,442 ngut ki briew kiba la shah kem ha baroh kawei ka jylla hadien ba ka jingkhynra ka dang iai bteng hapoh ka jylla, ong u CM ka Assam ha ka 6 tarik mynta u bnai.
