Shillong, Nailur 08 : Khatduh ia ka jingiakajia hapdeng ki Tourist Taxi Association ka Meghalaya bad Assam hadien ka jingjia 19 tarik Nailar la lah ban pynbeit mynta da ka jingmynjur baroh ar Jylla ban pynthikna ia ka iaid ka ieng ba khlem jingpyndik ia ki kali Tourist.
Ia kane la pyntip hadien ka jingialang ba long ha ka sngi ba-ar ha Shillong, kaba la wan iashimbynta da ki hynniew tylli ki Association na Assam bad san tylli na Meghalaya.
Ia kane ka jingialang la pyniaid lang da u Symbud Myntri Rangbah ka Meghalaya ba khmih ia ka Tnad Transport Bah Sniawbhalang Dhar lem bad u Myntri ka Sorkar Assam Atul Bora.
U Bah Sniawbha u pyntip ba kane ka jingialang, kabala pyniaid da ki Transport Commissioner jong baroh ar Jylla, ka dei kaba sngewtynnad bha bad baroh ki jingeh bala pynsgew da ki Association la iakren bad la pdiang ia ki.
“Ki Association na Meghalaya kila kyrpad ia ka jaka pynieng kali hapoh ka Kad Liengsuin bad ki jaka leit bar. Ka Sorkar Assam kala pdiang bad kan sa leh ia kaba donkam” ong u Bah Sniawbha.
U iathuh ba baroh ar Sorkar kila bthah ia ki Pulit jong ki ar Jylla ba kin iatreilang ha kaban khanglad ia ka jingpyndik ia ki nongniah kali tourist ha ka por ba talasi kali.
“Ki Association na baroh arliang kila kular ban iatreilang naduh nangne shakhmat. Lada dang don kano kano ka jingduna, kin sa iapynbeit hi paramaki ha kine ki khyndiat sngi” ula ong.
U Bah Sniawbha u bynrap ba ka Sub-Committee bala khlieh da ki Transport Commissioner jong barohh ar Jylla kin sa iakynduh haba dawa ka kam ban pynbeit ia kino kino ki jingeh kiba mih nangne shakhmat.
Haba pynkynmaw ia kiei kiba la jia, u Myntri ka Assam Atl Bora ula ong ba u Myntri Rangbah ka Assam Himanta Biswa Sarma ula bthah ia u ban iakren mardor ia kane ka kam bad ka Meghalaya hadien ka jingjia jong ka 19 tarik Nailar.
“ha ka 22 tarik Nailar, ngi la iashong jingialang ha Guwahati bad shim ia katto katne ki rai. Nga la leit iakynduh ia ki nongiakhih bad kila weng mardor ia ka jingiakhih” iathuh u Bora.
U iathuh ba iaka jingialang buddien ba long ha ka sngi Ba-ar la pynlong halor ka jingkyrpad jong ki Association ka Meghalaya bad ki jinglong jingman mynta kila wanphai biang kumba ju long baroh shikatta.
