Shillong, Rymphang 06 : U Nongseng bad Chief Adviser ka United Democratic Party (UDP) Bah Bindo M Lanong ula ong ba ka UDP kam I don jingkyrmen satia namar kan nym ioh wat 10 ngut ki MLA ha ka elekshon MLA ban long ha ka 27 tarik u Rymphang.
Une u Nongaibuit ba hakhieh duh ka UDP ula pyndep ia ka jingthep kyrteng kum u kyrtong shimet na Nongkrem Constituency hadien ba ula shah pynduh ticket ha ka party ba u iaseng. Ka UDP kala rai ban ai ticket ia u MLA ka Nongkrem Bah Lambor Malngiang.
U Bah Bindo uba dei ruh u Symbud Myntri Rangbah ka Jylla bad Lamphang barim ka Jylla ula ong ba ka dei ka tang ka “Jingmutdur” jong ka UDP ban kam ba u Myntri Rangbah ka Jylla un wan na ka party.
“Nga la dep ong teng ba kin nym tam ia 10 seat kat kum ka jingkhein jong nga. Ka jingkylli ba kin poi sha ka thong ba u CM ka UDP un ialam ia ka Sorkar, nga sngew ba ka dei tang ka jingphohsniew” ula ong.
Haba pynpaw ba u dei u trai UDP, u Bah Bindo ula ong ba ula iakhun kum u kyrtong shimet namar ba ula shah pyndep ia ka hok hadien ki Nongkhaii hehspah kila wan sha ka kam sain pyrthei.
“Kane ka dei kaba ki longshuwa kum u Bah BB Lyngdoh ula ong ba ym dei ban pynshlur ia ki Nongkhaii hehspah ba kin rung sha ka kam sain pyrthei. Ka paw shisha mynta ba ynda ki Nongkhaii hehspah kila long kum u President ka UDP, baroh kila kylla lut” ula ong haba bynrap “Ngam pat ju don kam jyrsieh ha ka jingim jong nga, nga la noh synniang shibun na ka bynta ka roi ka par jong ka Jylla bad ki paidbah hynrei la shu kyntait bad ai ticket sha uwei u briew u bym dei satia wat na ka UDP, u bym pat ju donlang ha ka UDP. Namar kata, baroh kila kyndit lut”.
Haba kylli ia ka jingkwah jong ka UDP ba un iakhun na East Shillong, u Bah Bindo ula ong “Kino kino kiba ong ia kata, ai ba kin leit bad pyrshang. Ngam tip balei ba kim don kyrtong hadien ba nga la kein ma nga. Ngam don eiei ban leh bad ka UDP ia mynta. Nga don ia u kyrtong mynta lada nga kwah hynrei kumno ngan tyrwa ne trei na ka bynta ka constituency ban don ia u kyrtong ka UDP. La kytait ia nga, ngam dei shuh u UDP. Ym dei ba nga ieh ia ka UDP hynrei la bret ia nga”.
Ula kam ba jin da ka UDP ka ai ticket ia u, ka party ka lah ban jop wat 12-15 seat namar kan nang jur ka jingkhring.
