Shillong, Rymphang 06 : Ka Election Commission ka Ri India (ECI), kala thoh sha u President ka Voice of the People Party (VPP) Bah Ardent M Basaiawmoit, ba pyntip ba ka Commission kam pat ai jingmynjur ia ka jingtyrwa ka VPP ban shim ia ka shap jong u ‘Prah’.
U Under Secretary ka ECI Manish Kumar, ula pyntip bha ka shithi bala phah ha ka 3 tarik Rymphang 2023, ba ka Commission kam pat ai jingmynjur ban pynlong ia u ‘Prah’ kum ka shap jong ki kyrtong ka VPP na ka bynta kane ka elekshon MLA-2023 ban long ha Jylla Meghalaya.
Une u Heh Ophisar ula pyntip ba kat kum ka jingtyrwa jong ka VPP bala phah da ka shithi ha ka 25 tarik Kyllalyngkot bad da ka email ha ka 30 tarik Kyllalyngkot, ula pyntip ba ka Commission ka donkam ia ka thup jong ki Constituency ban pynieng ia ki kyrtong ka long kaba donkam bad ba hap ban ai hapoh 5 sngi shuwa ka sngi ba pynmih ia ka jingpynbna (Notification) ia ka tarik jong ka elekshon, kaba dei ban long ha ka 25 tarik Kyllalyngkot.
“Namar kata, ka jingkyrpad ban ai ia kawei ka shap sha ki kyrtong bala pynieng da ka Party na ka bynta kane ka elekshon MLA ha Jylla ka dei ka bym pat ai jingmynjur” ong u Manish Kumar.
Lah ban kdew hangne ba ki kyrtong ka VPP kiba la thep kyrteng mynta kum ki kyrtong, kila buh ia ka shap jong u ‘Prah’ kum ka shap jong ka party.
