Shillong, Rymphang 06 : U Nongialam ka BJP bad kyrtong na South Shillong Bah Sanbor Shullai, ula kynthoh jur iala u jong u paralok ba iatreilang bad kyrtong ka BJP na Pynthorumkhrah Bah A.L.Hek, ba um lah satia ban kam ba un long u Myntri Rangbah ka Jylla lada ka BJP ka ioh ban synshar ia ka Jylla hadien ka elekshon MLA-2023.
U Bah Sanbor ula pynpaw ia kane hadien ka jingthep kyrteng kum u kyrtong ka BJP na South Shillong constituency hynne ka sngi nyngkong. Ia u Bah Sanbor la synran da ki nongialam na kylleng ki jaka ka constituency ha ryngkat ki nongkyrshan.
“Um (Hek) lah ban ong kumta…kane ka dei kaba bakla palat…um lah ban ong ba un long u Myntri Rangbah lane ba ma nga ngan long u Myntri Rangbah.Kane ka dei kaba bakla shibun” ong u Bah Sanbor.
U Bah Sanbor ula ong ba ka BJP ka dei ka National Party bad ia baroh kiei kiei la shim rai da ka Nongialam ka Party (High Command) na Delhi.
Ki khubor hamsaia kila saphriang kylleng ki jaka ba ki Nongialam ka BJP kila buh hakhmat ia u dkhot ba dang shu rung thymmai bad kyrtong ka Mawsynram Bah Himalaya Shangpliang kum u Myntri Rangbah lada wan ha ka bor. La ioh jingtip ba u Himanta Biswa Sarma, un wan synran ia u Bah Himalaya ha ka jingthepkyrteng lashai ka sngi ba-ar.
