Nongpoh, Rymphang 06 : Shiphew ngut ki kyrtong kila thep kyrteng hynne ka sngi nyngkong ha Ri-Bhoi ban mih aireng ha ka elekshon MLA-2023 ban long ha ka 27 tarik Rymphang bad napdeng kine, saw ngut ki dei ki kyrtong ka UDP.
Kine ki saw ngut ki kyrtong ka UDP ki dei u Bah Mayralborn Syiem (Nongpoh), Bathok Nongmalieh (Jirang), Baiahunlang Makdoh (Mawhati), bad Sunshine Makri (Umsning).
Ia kine ki kyrtong la wan synran da ki bahaiing hasem, ki nongialam ka party na ka District lem bad ki nongkyrshan na baroh saw tylli ki constituency.
Haba iakren bad ki lad pathai khubor, kine ki kyrtong kila pynpaw ia ka jingthrang ban wanrah ia ka jingkylla bad ka roi ka par ha ki constituency jong ki haba kyrmen skhem ba ki paidbah kin ai ka jingshaniah bad ban pynioh ia ki ia ka jingjop.
Kiwei kiwei ki kyrtong kiba la pyndep ia ka jingthep kyrteng mynta ka sngi ki kynthup ia ka Kong E. Kharbani na HSPDP Mawhati AC, u Bah Baiateilang Lapang na ka PDF na Umroi AC, u Bah Osbirth B Rynjah kyrtong Independent na Mawhati AC, u Bah Everist Maring BJP na Mawhati AC, u Bah Dorut Majaw na ka BJP Umsning AC bad u Bah Shanbor Ramde n aka BJP (Umroi).
