Shillong, Rymphang 04: U kyrtong ka United Democratic Party (UDP) na Mawlai constituency bah P.T Sawkmie ula ong ba ka mat ba hakhmat jong ban iakhun ha kane ka elekshon ka dei ban ioh ia ka Civil Sub Division nalor kiwei kiwei de ki mat.
Ia kane u bah Sawkmie ula ong hadien ka jingwan thep kyrteng naka bynta ban iakhun ha kane ka elekshon ka ban long ha ka 27 tarik mynta u bnai.
U bah Sawkmie ula ong ba ka Mawlai kadei ka constituency kaba heh tam ha Meghalaya bad dei namar kane la donkam ban don noh daka Civil Sub Division naka bynta ban pynioh shuh shuh ki kam pynroi hapoh ka thain.
“Naduh ki por ba nga don haka Liang Pyrshah nga la angnud ban pynioh ia Civil Sub Division ha Mawlai constituency hynrei ha kato ka por ngam don ha ka bor bad dei namar kane nga khlem lah ban pynsngewthuh ia ka sorkar ban ioh ia kane” la ong u bah Sawkmie.
U bah Sawkmie ula kam ba u la trei shitom bha baroh san snem na ka bynta ka constituency, khamtam ha ka por u COVID bad kum u MLA ka thain u khlem iehnoh ia ki paidbah bad hadien kane ka ilekshon ban wan ruh un iai bteng ban shakri iaki paidbah ka thain bad ka jylla baroh kawei.
U la kyntu kyrpad ia ki nongthep vote baroh jong ka Mawlai constituency ba kin ailad biang ia u ba un long u MLA jong ka Mawlai namar ka Mawlai ka dei ka constituency.
Halor ka jingshah kynnoh ba ka UDP ka don bynta lang bad ka NPP ha ka sorkar MDA ha kiba bun ki kam bad kumno kan sait khuid haba ia dei ia kane, u pynpaw ba u dang shu rung thymmai sha ka UDP, hynrei ka jingiohi jong u na jngai ka long ba ka NPP kam burom ia ka UDP bad ia ki paralok kiba don ha ka MDA.
U kubur ba ki don lang, hynrei kaei kaba u iohi ka long ba u pilot uba niah ia kane ka liengsuin u dei na ka NPP bad une u pilot u dei uba niah kulmar (rough) bad u bym pat ih bha ka pyrkhar pyrdain, u bym shim jingbahkhlieh ia la ki jong ki paralok ha ka sorkar MDA.
U la kynnoh ruh ba wat ha ka por synshar ka Congress, u Dr. Mukul Sangma u la leh dictator bad kumjuh hapoh jong ka NPP ba la ialam da u Conrad K Sangma, ki leh dictator kumjuh.
