Shillong, Rymphang 04 : U National Vice President ka NPP bad Symbud Myntri Rangbah Bah Prestone Tynsong, hynne ka sngi saitjain, ula ong ba ka lyer jong ka NPP kala beh ha baroh kawei ka Jylla bad ka Party khlem pep kan tam ia u ‘Magic Number’ (30+) ban thaw ia ka Sorkar dalade.
Hadien ka jingthep kyrteng kum u kyrtong na Pynursla Constituency, u Bah Prestone ula ong “Ka BJP ha u snem 2019, kala ong b aka lyer jong ka, kala beh bha hynrei ka dei ka lyer khriat. Namar kata, ka lyer ka don beit hynrei ngi la iohi bad la dep mad bad ai ki (BJP) kan kren kat kaba mon hynrei nga ong ha phi ba ia mynta, ka lyer jong ka NPP kala beh sha baroh ki jaka bad ngi sngew skhem bha ba ngin tam ia u magic number-32-33 seat”.
“Nga la dep wan na kylleng ki constituency bad nga la iohi ba kane ka elekshon ka ban long la 27 tarik Rymphang, ka rai jong u paidbah na manla ki jingialang bala don ka long kaba noh sha ngi. Namar kata, nga thikna ba ha ka 2 tarkkLber, ngin sa tam ia u nombor ba donkam, ngin sa jam sha shiliang ka jingkieng bad ngin sa pyniaid ia ka Sorkar tang dalade” ula bynrap.
Ia u Bah Pretone la synran da I kurim bad u Khun nalor ki Nongialam bad ki Nongkyrshan ka NPP na Pynursla.
Halor ka jingkynthoh ki Liang Pyrshah ba ka jingtreikam ka Sorkar MDA ka long kaba pynjot ia ka Jylla, u Bah Prestone ula ong “To ngin ap bad peit ha ka 2 tarik Lber ynda la niew ia ki vote bad phi sa iohi bad ngin sa pynshisha ia kata b aka rai jong ki paidbah kala noh sha ngi bad ha ka jaka jong ka jingjot, kan dei ka jingjop ia ngi”.
Hynrei ula ong ba ka jingmut jingpyrkhat jong ka NPP mynta ka long ban iakhun tylli lang ia ka elekshon haba jubab ia ka jingkylla la ka party kan iakren halor ka jingdawa ban ioh noh da u Myntri Rangbah uba dei u Khasi bad la u long uba kloi ban shimti ia ka kam.
“Ngi la iakhun da ka jingiatylli kawei ban tam ia ka 32-33 seat. Hadien ba ngi pyndep ia kane, ki Nongmihkhmat ba thymmai kin sa shong bad kin sa jied ia u Nongialam ba thymmai. Ia mynta hi kumba nga ong, ngi dan don hapdeng jong ka jingkieng, ai ba ngin tam shuwa ia ka jingkieng” ula ong.
Haba kylli, ula ong ba ka AITC kaba don ha ka liang pyrshah kala pyni ba kam don satia kata ka jingshimkhia ban pynbeit ia ka jingiakajia pud bala slem bha da kaba kwah ban pyndam noh ia ka MoU bala iasoi hapdeng ki Myntri Rangbah ka Jylla Meghalaya bad Assam.
“Kumba nga ong, ki paidbah kin sa bishar bad ki paidbah kin sngewthuh bha ia kaei kaba ki kwah bad kaei ka jingthmu jong ka TMC, kaba dang shu rung thymmai bad kaban sa ioh ia ka jubab ha ka 2 tarik Lber” ula ong.
Haba kyntait ban kynthoh ia ka nongrim jong kiwei ki party halor ka ILP, u Bah Pretone ula ong ba ka NPP kala kut jingmut ban buddien bad ka Sorkar India ha ka ban pyntreikam ia ka ILP bad ruh ban pynrung ia ka ktien Khasi bad Garo ha ka khyrnit ba phra jong ka riti synshar ka ri.
Halor ki jingkynnoh bamsap pyrshah ia ka Sorkar MDA, une u Nongialam ka NPP ula ong bay m don mano manor uh ba lah ban shu pynkular jingmut hapdeng u paidbah hynrei lada ki don ia ka sakhi balei ba kim iaid kat kum ka ain.
“Nga ju ong ia ki ba lada phi don shibun ki jingkynnoh pyrshah ia ka Sorkar ba ialam ka NPP, sngewbha iaid kat kum ka lynti ka ain kaba ngin ym lah ban buhrieh ia kaei kaei ruh…Nga ong ha phi ba ka Sorkar NPP kala pyrshang katba lah bad ngin iai bteng ban pyndep lane pynrulong ia ka jingangnud jong ki paidbah ka Jylla” ula ong.
Halor ka jingpyrshang saitkhuid jong kiwei ki party ba iadonlang ha ka MDA da kaba kynnoh beit beit tang ia ka NPP, u Bah Prestone ula ong ba ki paralok kila kren pyrshah bha ia ka NPP hala ki jong ki constituency hynrei ki nongthep vote kim dei kiba biej.
Haba kren iala ka jongka constituency, u Bah Prestone ula pynpaw ia ka jingsngewskhem ba un shah jied biang kum u MLA. U ong b aka Civil Sub Division kala treikam pura bad ka kam kala iaid ban wanrah ia ki tnad bapher bapher ha kane ka Sub Division na ka bynta ka bha ka miat jong u paidbah.
“Ngi la ioh ruh ia ka mang tyngka ban tei ia ka Mini Secretariat. Ka kam ka dang shu sdang bad ngin hap aps a shisnem lane arsnem ba ngin lah ban pyndep ia ka Mini Secretariat bad ia baroh kiei kiei ngin sa pynkynriah sha ka Pynursla Civil Sub Division” ula kular.
