Shillong, Rymphang 03: Ka Bharatiya Janata Party (BJP) Meghalaya hynne ka sngi kala pan jingmut naki paidbah ka jylla haba iadei bad ki mat ban pyntrei hadien ka elekshon (election manifesto) da kaba shu ai miss call ha u Nomber 836 000 6060 lane daka ba leit ha ka website www.mpowermeghalaya.com bad ia kine ki jingai jingmut yn sa pynrung ha ka Manifesto ba ka Party ka thmu ban pynmih naka bynta ka ilekshon 2023.
Ka Party kala pyntip ba kane ka jingshim jingmut na ki paidbah ka jylla kadei naka bynta ban thaw iaka Manifesto kaba ki paidbah ki kwah daka ba kynthup iaki mat ba ki paidbah bad ka jylla kila angnud mynta la bun bun snem.
Kala pyntip ba ka BJP Meghalaya ka kwah ban kren ne bishar iaki mat ba ktah iaka bha ka miat ki paidbah ka jylla khamtam ki mat lane ki jingeh haba iadei bad ka imlang sahlang kiba man ka sngi.
“Ki paidbah kiba mad iaki jingeh bad kiba iakynduh man ka sngi bad dei namar kane ka BJP Meghalaya ka sngew ba ki paidbah ki don ka hok ban pynwandur iaka Manifesto jong ka Party bad naka liang ka Party kan ialeh katba lah ban pynurlong ia baroh ki jingai jingmut lada ka ka Party ka ioh ban thaw sorkar hadien ka ilekshon” la ong ka kyrwoh naka BJP.
Ka kyrwoh naka BJP ka kdew ba ha kine ki san snem ban wan ka jylla kan thaw histori haka ba iadei bad ka synshar khaddar haka ba ki rai ba ka sorkar ka shim kan dei lyngba ka jingai jingmut ki paidbah kiba la ai ka bor iaki nongthaw sorkar.
La bynrap ba ki nongialam kiba dei ki nongshakri paidbah kidei ban pyntreikam iaki projek katkum ka jingdonkam ki paidbah na baroh ki thain ka jylla Meghalaya khnang ba baroh kin ioh ka jingmyntoi bad ka sorkar ruh kadei ban long naka bynta baroh khlem da noh shillaing.
“Ka BJP Meghalaya ka kwah ban pynpoi iaki kam pynroi ha man la ki kyndong kynshrot ka jylla bad kidei ban poi sha baroh ki nong shong shnong ka jylla bad kane ka kan urlong lada ki paidbah ki pynkupburom iaka BJP ha kane ka ilekshon ban wan” la ong ka kyrwoh.
