Shillong, Rymphang 03 : U National President ka NPP bad Myntri Rangbah ka Jylla Conrad K Sangma ula ong ba lada ka Trinamool Congress (TMC) ka khein Nongwei ia ka BJP bad kiwei ki National Party ba kin wan synshar ha West Bengal, hangne ha Meghalaya ruh ka TMC ka dei ka Nongwei bad ka Jylla ka don la ki jong ki party kiban synshar dalade ialade.
U Conrad ula kren ia kane na ka rynsan ialap elekshon jong ka NPP ba long hynne ka sngi thohdieng ha Jowai, haba pyllait ruh ia ka manifesto elekshon jong ka party kaba la ai kyrteng “People’s Document-Vission 2023-2028”.
U Myntri Rangbah ula pynkynmaw ia ki paidbah ba ka TC ka dei ka party kaba wan na West Bengal. Ula pynkynmaw ruh ia ka jingkren jong ka hehduh ka TMC Mamata Banerjee ha kaba kala pynbna ba ka West Bengal ka don iala ka jong ka party bad kam donkam ia kiwei ki National Party ban batai ia ki kumno ban synshar ia ka Jylla. Da kane ka juh ka nongrim, ula ong ba ka TMC ka dei ka party nongwei ha Meghalaya bad ka Jylla ka tip kumno ban phikir ialade.
“Lada ka Mamata Banerjee ka ong ba ka BJP bad kiwei ki National Party ki dei ki Nongwei ha West Bengal, kane ka juh ka nongrim kan treikam ha Meghalaya ia ki, namar ka BJP bad kiwei ki National Party hakhmat ka Mamata ki dei ki Nongwei, kumta ruh ka TMC ka dei ka nongwei ha Meghalaya. Ngi don la ki jong ki Party, ngi tip kumno ban pyniaid ialajong. Ngi la burom ia ka Mamata Banerjee namar ka burom ia u Nongialam (L) PA Sangma hynrei ka elekshon hi ka iapher” ula ong.
Haba kdew ba ki briew hapoh ka TMC ki dei ki juh kiba la aibor 8 snem ban synshar ia ka Meghalaya, hynrei kim shym la lam ban pyntyllun shakhmat ia ki kam, u Conrad ula ong “Ki briew kiba don ha ka TMC ki dei ki briew kiba phi la dep ban iatreilang lang, phi la iohi ia kaei kaba kila leh bad kaei kaba kim shym lah ban leh. Mynta kila wan da ka uniform ba thymmai, ai ki jingkular ia phi ba kin khmih ia ki ishu bapher bapher, ki paidbah kila dep ban pyrshang bad dep mad ia ki”.
Une u Khliehduh ka NPP ula antad ruh ba ka TMC kan nym jop palat 2-3 seat ha kane ka elekshon ban wan ha Jylla bad kane hi kan long hapdeng ka jingialeh kaba jur bha. “Nga thikna ba ka TMC kan nym jop palat ia 2-3 seat ha ka Jylla jong ngi. Kamp het katno kila kren ha ki jingialap elekshon hynrei haba ka result kan mih ha ka 2 tarik Lber, kin sa ioh tang 2 seat duh, phi sa peit ia kane ka sngi. Kane ka dei kaban jia ia ka TMC” ula kynthoh da ka jingngeit kaba skhem.
Ula ong ia ki paidbah ka Jowai baka NPP kan sa wanphai biang da ka jingjop ba bun paid duh bad kyntu ia ki ba kin nym pynsepei kai ia ki vote jong ki sha ka TMC, ka bym don lawei ha Jylla.
“Ki paidbah ka Jowai kim dei ban pynsepei kai ia ki vote bad kim dei ban thep ia ki vote jong ki sha ka party ka bym don jingmut (TMC), ka bym lah ban leh eiei na ka bynta jong ki hadien habud. Phi hap ban rai, ki paidbah ka Jowai kin jap ban rai ia kaei kaba ki kwah ban leh” ula ong.
