Shillong, Kyllalyngkot 31: Ka Kyrtong jong ka NPP na Nongthymmai Constituency Dr Jasmine Lyngdoh kala kyntu ia ki paidbah ba kim dei ban shah pynbiej ha ka pisa ha ka jingjied nongmihkhmat hynrei kidei ban pyrkhat jngai ia ki kam pynroi kiba ki lah ban ioh shi rta.
“Ngi te ngi ai 100 na ka 100 hynrei kan shong pat ha ki briew ba kin ai iaka 100 na 100 ka jongki ba kin ai jingkyrshan, namar ki iohi kumno ngi trei bad ki tip ia ki prokram kiba ngi la leh ha ki shnong ki thaw ha Nongthymmai bad ha ka jylla bad nga kyrmen ba ki paidbah kin don beit bad ngi” ong ka Dr Jasmine haba iakren bad ki nongthoh khubor hadien ba kala dep ban wan thep kyrteng ban iakhun iaka elekshon MLA.
“Ki paidbah haka jingduk ki lah ban shim ia ka pisa hynrei lada kita ki briew ki kylla long MLA kin ym ithuh shuh ia ki, kumta ki paidbah kidei ban pyrkhat bha la ki kwah ia ka pisa kaba tang shi sngi ne ia ki kam pynroi kiban wan shi rta ka jingim ka jongki” ong ka Dr.Jasmine haba bynrap “Yn ym don ba lah ban thied ia ka Vote hynrei kan shong ha ka rai bad ka hok jongki bad kadei ruh ka jingkyrmen ka jongki, kumta ki paidbah kidei ban sngewthuh bha ia kane”.
Kala ong, ka thong ka jongka ka long ban kyntiew iaka Constituency bad ban don lang beit bad ki paidbah man la ka por bad kumjuh ban sngap iaka jingeh ki paidbah bad ia ki jingdonkam jong ki shnong ki thaw khamtam ha kaban shimkhia iaka jingjynjar jong ki paidbah na ka jingkyrduh um ha Nongthymmai.
“Ki dang don bun kiei kiei kiba hap ban leh haka thaiñ Nonthymmai, la ki dei ki nongthep vote, ki surok, ki jingdonkam ha ki shnong ki thaw bad nga tharai ki samla ki donkam ia ki nongialam bad ngi don ma ngi ban ialam ia ki” ong ka Kong Jasmine.
Kala ong, ka rukom treikam jong u MLA ba mynta u Bah Charles Pyngrope kam shym la kot satia kat kum ka jingangnud jong ki paidbah.
“Ki don bun kiei kiei kiba u MLA um shim la shimkhia satia… kum u dkhot ha ka Liang Pyrshah ki ioh ia ka lad ban kynnoh ba ki don ha ka liang pyrshah, lehse ki paidbah ka Nongthymmai kin long kiba stad bad kin vote noh ia kiwei kiba don ha ka seng kaba don ha ka liang synshar” ong ka Kong Jasmine.
Kala banjur ia ka jingdonkam ban shimkhia iaki mat kiba iadei bad ki kynthei bad kadei kaei kaei kaba ym shim la shimkhia bha la bun snem bad ka paw la kumba ym don ba sngap iaka jingeh ka jongki bad ym don ba patiaw ia ka jingeh kaba ki mad.
“Ka long ka kam kaba khia bha ia nga bad nga tip shai ba ngan trei shitom bha, ban iakren bad ki bad ban pynthikna ba ngi don iaka plan kaba paka bad kumjuh ruh ban pynthikna haba ngi ai kano kano ka jingkular ngi ai ka jingkular na ka bynta ka san snem” la ong ka Kyrtong ka NPP na Nongthymmai.
