Tura, K’lyngkot 28 : Ki Dkhot ka Meghalaya Pradesh Youth Congress (MPYC) kila thang ia ka tyngshop jong u President ka MPPC ma Vincent H Pala bad jong ka Working President Deborah Marak lem bad ki arngut ki kyrtong ha Congress hynnin ka miet shabar ka Congress Bhavan ha Tura.
Kine ki Dkhot ka MPYC kila thang ia kine ki tyngshop namar ka jingbitar halor ka jingbym hun ia ka rukom ai ticket ia ki kyrtong ban aireng ha kane ka elekshon ban wan.
Ki tyngshop bala thang ki kynthup ia ka jong u Ma Vincent, ka Deborah, u Kyrtong ka Gambegre Saleng A Sangma bad u kyrtong ka North Tura Billykid A Sangma.
Kane kala wan hadien ba ki Nongialam kim shym la mynjur ban pynkylla ia ka jingai ticket ia ki kyrtong bala aipor ban leh hapoh ka 24 kynta.
Ka MPYC kala dawa ba ki Dkhot ka Party kiba la pan ia ka ticket ban iakhun ia ka elekshon la 27 tarik Rymphang, ki dei ban shah jied ha ka jaka jong ki nongialam na kiwei pat ki party kiba dang shu wan iasoh bad ka Congress.
Kila bitar eh halor ka rai ban ai ticket ia u Nongialam ka NCP Saleng Sangma na Gambegre bad u Nongialam barim ka AITC u Reynold M Sangma na Selsella. U Saleng u dei u pyrsa jong u Billykid A Sangma.
Ki Nongialam ka MYPC kila pynbna ruh ba kin sa hiar shuki noh na ka party kum ka jingpyrshah ia ki nongialam namar ka jingbym sngap ia ka jingdawa jong ki.
