Shillong, K’lyngkot 28 : Ka Congress hynne ka sngi saitjain kala kyntu ia u Nongialam ka BJP ba khmih ia ka Meghalaya M Chuba Ao ba um dei ban pynlut por ha kaban tuklar ia ki kam pohiing jong ka party.
“U Ao ula dei ban pynbunkam ialade ha kaban pynjanai ia ka jingtreikam jong ka party lajong (BJP)” ong u Dr Omarlin Kyndiah, President ka Shillong City Congress Committee ha ka kyrwoh.
U Dr Omarlin ula kynthoh ia kane halor ka jingkam u Chuba Ao ba ka Congress kan jop tang na ki lai ne saw tylli ki constituency ha kane ka elekshon ban wan.
U Dr Omarlin ula ong “Nga ngeit ba ka BJP kala shemphang na kaei kaba jia ha ka elekshon bala dep kata ka long ban burom ia ki nongrim jong ka Riti Synshar ka Ri bad ban leh eiei pyrshah iala ki dkhot kiba pynkhein”.
“Watla u Chuba Ao ula pynpaw ia ka jingsngewskhem ba ka Party kan leh bha ha kane ka elekshun hynrei kane ka long pyrshah ia ka jingkhein antad jong u President ka BJP Meghalaya Ernest Mawrie. La i kumba u Ao bad ka BJP ki don hapdeng ka jingbym thikna ia kaei kaba ka BJP kan long ha kane ka elekshon ha Meghalaya. Kane ka pynlong ia ka BJP kum ka party “kaba dang artatien jong ki Nongialam ba artatien”.
Ha ka sngi thohdoeng, u Ao ula ong ba ka jinglong jingman jong ka Congress ha Meghalaya kam long satia kaba ibiang.
“Ki (Congress) shym ioh satia ia ki kyrtong kiba biang ban pynieng bad ki lah ban jop tang na lai ne saw tylli eh ki constituency kat kum ka jingkhein antad jong ngi” ula ong.
