Nongpoh, K’lyngkot 28 : Ban tehlakam ia ki jingjia aksiden kiba wanrah ia ki jingduh noh jong kiba bun ki mynsiem, ka FKJGP Bhoirymbong Circle kala pynïeng syndon da ki signboard haka shnong Bhoirymbong Lumdaitkhla bad Lumsohpieng ba mana ïaki nongniah kali bad thuk thuk ba kim dei ban pynher sted ïaki kali palat ia ka speed limit bala buh.
Ka Seng FKJGP hapoh ka jingïalam u Samla Boy Kurbah President bad u samla Banseng Sohiong Secretary lem bad ki dkhot, kala shim ia kane ka sienjam namar ka jingiohi ia ki jingma kaba ap ia ki nongleit nongwan ha ka thain na ka jingniah kali khlem pyrkhat jong ki briew.
Haba kren sha ki lad pathai khubor, u Samla Banseng u la pynpaw ba kum ka seng ka dap da ka jingsngewkhia kaba jur halor ka jingpynher sted jong ki kali haka thaiñ Bhoirymbong kaba lah ban buh jingma ïaki paidbah haka leit ka wan bad lah ruh ban wanrah ki jingjia ba sngewsih.
“Halor katei ka nongrim, ka seng kala pynïeng syndon da ki Signboard ha katei ka thaiñ haka jingiasnohkti lang ki Dorbar Shnong, ba maham ba ki paidbah kim dei shuh ban ñiah khyllew ïaki kali hynrei ban ñiah suki jai khamtam haki jaka ba bun briew bad lada lap ïa kiba pynkheiñ naka liang ka seng kan sa shim da ki sienjam kiba tyngeh” ula ong.
Ki Dorbar Shnong jong ka Lumdaitkhla bad kumjuh ruh ka Lumsohpieng kila ai ka jingkyrshan ba pura ïaka seng ban ïada na kino kino ki jingjia ba sngewsih kiba lah ban jia tang naka jingñiah sted bad thurmur ïaki kali bad kyrpad ruh sha ki paidbah ba kin bud ryntih ïaki kyndon ban lait naki jingjia ba sngewsih.
