Shillong, K’lyngkot 27: U Working President ka Congress Bah Pynshngain N Syiem hynne ka sngi thohdieng, ula pynpaw ia ka jingsngewskhem ba un ioh ia ka jingjop na Pynthorumkhrah Constituency, ha ka elekshon MLA ban long la 27 tarik Rymphang.
Kat kum ka jingong jong u, ka rai jong kiba bun ki kyrtong ban iakhun na ka Constituency ka dei “jingialehkai jongno re” hynrei ki paidbah ki kham stad.
U Bah Pynshngain uba dei u Nongialam ka Liang Pyrshah ha KHADC, ula pdiang ruh ia ka jingwan iasoh jong u kyrtong barim ka NCP Bah Freddy Nongrum bad General Secretary barim ka BJP Pynthorumkhrah Mandal Bah P Lyngdoh lem bad 50 ngut ki Nongkitkam ka Party ha ka jingialang ba long ha Congress Bhavan.
“Ka jingwan iasoh jong ki khlem pep kan iarap bha ia ka Congress ban jop ha ka elekshon ban wan na Pynthorumkhrah” ula ong.
Haba pynpaw ba u don ka jingiadei ba iajan bha bad ki paidbah jong ki Shnong ki bym hap satia hapoh ka Mawkhar-Pynthorumkhrah MDC Constituency, u Bah Pynshngain ula ong “Ngam don jingeh ban jop ha kane ka elekshon ban wan”.
“Kam da don jingiapher eh (hapdeng ka elekshon MDC bad MLA). Ia mynta, kila don lypa haduh 7 tylli ki Shnong ha Pynthorumkhrah constituency kiba la don lang ha Mawkhar-Pynthorumkhrah constituency bad ki artylli ki don ha Mawlai bad Laitumkhrah constituency. Ngam don jingeh ban pynsngewthuh ia kiwei ki shnong ban kyrshan ia nga. Ngam don jingeh ban leh eiei haba iadei bad ki jingeh ba mad da kiwei ki shnong hapoh ka Pynthorumkhrah constituency” ula bynrap.
U Bah Pynshngain ula ong ba ka Pynthorumkhrah ka dei kaba iashongkhleh jaitbynriew bad kam da iapher eh bad ka constituency barim jong u ka Mawsynram, kaba shong shnong ruh da kiwei kiwei ki jaidbynriew.
Haba kylli, une u MDC ula ong ba ula dep pyni ba watla u long u MLA barim jong ka constituency ba nongkyndong, ula jp ia ka elekshon MDC na Mawkhar-Pynthorumkhrah. Ula bynrap ba lada u jop ia ka elekshon MDC tang 40 sngi ka jingpynkhreh, un sa ioh ruh ia ka jingjop ha ka elekshon ban wan, kaba ula pynkhreh mynta la laisnem shiteng.
Ula ong ba um lah ban shim stieng iaka ilekshon namar wat u bah D.D Lapang ula rem teng wat haka por ba u dang bat kum u myntri rangbah ka jylla.
“Ngam don jingeh ban iakhun pyrshah iano iano ruh hynrei ym dei ban shim khein sting bad nga donkam ban trei shitom bad nga donkam ban pyniajan bad ki paidbah. U bah Hek u don bun ki paralok, nga ruh nga bun ki paralok” ula ong.
U bah Pynshngain ula ong ba u tip kumno ban iakhun ilekshon bad baroh artylli ki jaidbynriew kin kyrshan ia u bad ia kane yn sa tip haka 2 tarik Lber.
Haba buh jingkylli iaka jingmih ki kyrtong, u bah Pynshngain ula ong ba kane ka long kumba mih tit hynrei ki paidbah kiba thep Vote ki kham stad ban ia kine ki kyrtong kiba la mih kumba mih tit.
“Kumba iohi mynta kane ka jingmih ki kyrtong ban iakhun ilekshon khamtam naka bynta ka ilekshon ML ka long khun jakai hynrei ki paidbah ki stad bad ha kane ka ilekshon bun ki kyrtong ki mih ban iakhun rem ym ba ki mih ban iakhun jop” ula bynrap.
U bah Pynshngain ula kyntu ruh iaki paidbah khamtam iaki samla ka jylla ba kim dei ban ngop haka bor pisa namar ka kyrduh kam haoh ka jylla ka jur bha.
“Ngam kren tang kam sorkar ne kam riew shimet hynrei ki samla kidei ruh ban lah ban sengkam lajong bad dei namar kane ki samla ka jylla kim dei ban shah pynbeij ha ka bor pisa haka por thep Vote. Ka Meghalaya kala hiar arsut haka jingshisha ka nongbah Shillong kala paw pyrthei kum ka jaka pule puthi hynrei mynta ka kynti, ka pule puthi, ka koit ka khiah, ka ioh kam ioh jam bad ka ioh ka kot kala hiar namar ka jingshah ialam bakla ha ka bor pisa” la ong u bah Pynshngain.
Nalor kane u bah Pynshngain ula kyntu iaki paidbah ka Meghalaya ba kim dei ban jied iaki nongkhaii dewiong ne ki heh saipan hynrei kidei ban jied iaki nongthaw ain naka bynta ban kyntiew iaka jylla ha ki bun balang.
Naka liang u bah Predecessor Rumnong haka jingkren ula kynnoh ba u MLA ka Pynthorumkhrah u bah A.L Hek haka jingling MLA kaba 25 snem u khlem lah ban pynurlong iaka jingthrang ki paidbah ka konstitwensi.
“Kaei kaba pynlong ia nga ban iasoh bad ka Congress kadei namar ka konstitwensi ka kiew haba iadei bad ka roi ka par mynta la 25 snem tam” la ong u bah Predecessor.
U bah Predecessor ula kam ba ka Pynthorumkhrah konstitwensi ka long kaba donbok ban ioh ia u bah P.N Syiem kum u kyrtong ha kane ka ilekshon namar udei u nongialam u ba lah ban pynurlong iaki jingthrang ki paidbah ka thain.
Ula kynnoh ba ka sorkar MDA kala Pheil ha ki bun balang bad ula kam ruh ba ka Pynthorumkhrah konstitwensi kan dei ka jingsdang ban ratdhong iaka BJP napoh Meghalaya bad na ka ri baroh kawei.
