Shillong, Kyllalyngkot 27: Ka ophis jong u Commissioner of Customs (Preventive) NER Shillong, CBIC, Ministry of Finance, hynne ka sngi thohdieng, kala rakhe iaka International Customs Day 2023 da kaba pynlong iaka jingialang ha Soso Tham Auditorium, Shillong.
U Chief Commissioner, CGST, Customs and Central Excise, Guwahati, u Yogendra Garg, uba long ruh u Zonal Head jongka Indirect Taxes ha ka Thain Shatei Lam Mihngi, haba kren ha ka jingialang kum u kongsan, u la ai ka jingiaroh ia ki kynhun kum ka BSF, Assam Rifles, ITBP, SSB bad kiwei pat ki kynhun na ri Bhutan bad Bangladesh.
Ula ong ba ka long kaba donkam ban ithuh kyrpang ia ka sap ka phong ba nylla bad ha ka jingiaid ka por jong ka jingkiew jong ka ioh ka kot, kumta ka long kaba donkam ban don ia ka kynhun kaba tbit bad ban pynrungkam thymmai da kaba ai ka jinghikai kaba paka.
U Garg ula pynkup burom ia ki ophisar bad ia ki nongtrei jongka CBIC bad ia ki kynhun kiba iatreilang kum ka Assam Rifles bad Border Security Force halor ka jingtrei shitom ka jongki ia ka kam.
Ka Commissioner Customs (Preventive) Shillong, Kong Abhilasha M. Basaiawmoit kala pynpaw ba iaka jingrakhe International Customs Day, la sdang da ka World Customs Organization (WCO) bad la rakhe man la u snem ha ka 26 tarik u Kyllalyngkot.
Ka ri India kala long dkhot jongka WCO ha ka 15.02.1971 bad namar ba ka ri kala rakhe iaka Republic Day haka 26 tarik u Kyllalyngkot, kumta ia ka Customs Day la rakhe noh haka 27 tarik u Kyllalyngkot.
Ka matpdeng jong ka jingrakhe mynta u snem iaka Customs Day ka long “Nurturing the next generation: promoting a culture of knowledge-sharing and professional pride in Customs” bad ha kane ka jingrakhe ki riewpawkhmat na ka Customs Preventive NER, CGST, BSF, Assam Rifles bad DRI kila ai jingkren bad pynpaw iaki jingeh kaba ki iakynduh bad ia ki jingjop kiba ki ioh mad haka jingtrei ia ka kam ha ka jingpeitngor ha ki thaiñ khappud bad ban pyntreikam iaka Customs Act.
Ha katei ka jingrakhe la iadonlang u Chief Commissioner Income Tax, Vice Chancellor jongka North Eastern Hill University, u IG jong ka BSF, ki ophisar kiba la shongthait jongka CBIC, Consul General Bhutan bad kiwei kiwei.
