Shillong, K’lyngkot 27 : Ka Bharatiya Janata Party (BJP) kan pynbna ha u bnai ban wan ia ka thup jong ki kyrtong na ki 60 tylli ki Constituency ka Jylla ki ban mih iakhun ha ka elekshon MLA ban long ha ka 27 tarik Rymphang.
“Ngi la pynkhreh ia ka thup kyrteng mynta ka sngi bad ngin sa phah noh sha Delhi bad ngin sa pynbna ia ka kyrteng ki kyrtong hapoh ka 2 tarik u Rymphang” ong u Bah Ernest Mawrie, President ka BJP haba iakren bad ki nongthoh khubor hadien ka jingialang jong ka State Election Committee (SEC).
U Bah Ernest u pyntip ba ka Party kala rai ban pynieng kyrtong na baroh 60 tylli ki Constituency. Kat kum ka jingong jong u, ka BJP kan pynieng ym duna ia ka 10 ngut ki kyrtong kynthei na ki Constituency kum ka Shella, Jirang, Nongpoh, Selsella, Dalu, Mawkyrwat bad kiwei kiwei.
Haba pyntip ba ki don ki constituency kiba don arngut ki nongpan ticket, u Bah Ernest ula ong “Ngin phah lut ia ki kyrteng sha Delhi. Ka kyrteng ba khatduh yn shim rai da ka Central Parliamentary Committee (CPC), ka ban sa iakynduh ha ka 31 tarik Kyllalyngkot”.
Kat kum ka jingong jong u, ka CPC kan sa shim rai haba iadei bad ka elekshon Tripura bad Nagaland ruh, ki ban sa leit sha ka elekshon ha u bnai ban wan.
Haba kylli halor ka jingslem ban pynbna ia ka thup ki kyrtong, u Bah Ernest ula ong ba ka BJP ka dei ka National Party bad ka don la ka jong ka rukom treikam. “Ngi la trei iala kijong ki kam bad kam pher la kin pynbna noh lashai ia ki ticket ne hadien lai sngi, kan ym don jingpher satia namar ngi lah dep lur lypa ka sem ia ka lyngkha”.
U Bah Ernest u pyntip ba la Party kala dep pynkhreh ruh ia ka manifesto bad kan sa pyllait noh mardor hadien bala dep pynbna ia ka kyrteng jong ki kyrtong.
Ka BJP ka don mynta tang arngut ki MLA -Sanbor Shullai (South Shillong) bad Bah AL Hek (Pynthorumkhrah) –na ka Iingdorbar ba 60 ngut ki Dkhot.
Haba pynpaw ia ka jingsngewskhem ba ka Party kan jop bun seat ha ka elekshon ban wan, u Bah Ernest ula ong “Dang shen ngi la khein antad ba ngi lah ban jop tang hapoh 25 seat hynrei mynta ngi la khein antad haduh 35 seat bad ngi khmih lynti ban nang jop bun khnang ba ngin lah ban ialam ia ka sorkar”.
“Ngim don jingthmu ban iatreilang bad no bad no ruh. Ngin ap shuwa ia ka result ba ngin tip ia kiwei ki seng kiba iasngewthuh jingmut bad ba kloi ban bud ia ki mat jong ngi ban ioh ia ka sorkar kaba lait na ka bamsap” ula bynrap.
Haba kylli halor ka ILP, u Bah Ernest ula ong ba ka Sorkar Jylla kala dei ban mynjur ia ka Resolution ha IIngdorbar Thaw Ain halor kane ka kam. “Baroh ki MLA kila kyrshan ia kane ka mat bad kane ka kam kala poi sha ka Sorkar Pdeng, Namar kata, ka Sorkar Pdeng kan sa shim iala ka jong ka lynti bad ban rai. To ngin ap ia ka rai jong ka Sorkar Pdeng” ula bynrap.
Haba iadei bad ki kyrtong kiba don dak kam sniew, une u President ka BJP ula ong ba ka Party kam pat ioh jingtip satia ia ka jingdon kum kine ki kyrtong.
