Barpeta, K’ lyngkot 25 :Tang shi sngi hadien ba ka sorkar Assam ka la shim ia ka rai ban pynlong ka jingkhynra halor ki kam pyniathoh shongkurim khynnah (child marriage) ha baroh kawei ka jylla, ka jingjia jong ka jingkhlad noh kawei ka khynnah kaba la ngat ha ka jingshah leh beijot bad kaba la shah pynbor ban kha ia i khunlung ka la paw pyrthei.
Katkum ki khubor la iathuh ba katei ka khynnah kaba dang 13 snem rta ka la khlad noh hapoh Barpeta Medical College Hospital ha ka 24 tarik mynta u bnai katba ka dang don hapdeng ka jingshah sumar.
Kane ka khynnah ka dei na ka shnong Bhuskhuli kaba hap hapoh Rangsai police station ha Goalpara district ka Assam.Kane ka khynnah kaba la shah leh beijot hynniew bnai mynshuwa ka la kha ia u khunlung shynrang hapoh Goalpara civil hospital ha ka miet jong ka 22 tarik mynta u bnai.Hynrei ine i khunlung i la khlad noh tang khyndiat por hadien ba la kha.
Ha kawei pat ka bynta ia kane ka khynnah la pynkynriah noh shapoh Barpeta Medical College Hospital na ka bynta ban ioh ia ka jingsumar kaba kham biang hadien ba ka koit ka khiah jong ka kala hiar arsut.
Kane ka khynnah ka la shah leh beijot ha uwei u briew 40 snem rta uba kyrteng u Jug Sangma katba ka dang don ha ka lynti ban leit sha ka iingsah jong kawei ka paralok, bad une u briew ula byrthen tyngeh ia ka lada kan iathuh briew halor kane ka jingjia.
Lah ban kdew hangne ba ki dkhot ka longiing jong katei ka lanot la ong ba kim shym la nud ban leit ujor halor kane ka jingjia namar ka jingshah byrthen pyniap lada kin leit ujor halor kane ka jingjia.
Shuh shuh kane ka jingkhlad jong kane ka khynnah kaba la ngat ha ka jingshah leh beijot ka la pynkhihwin ia ka thain Rangsai jong ka Goalpara khamtam hadien ba kala don hapdeng ka jingshah sumar.
Ha kawei pat ka bynta na ka liang kiba haiing hasem ki la ujor da ka FIR pyrshah ia u Jug Sangma uba donkti ha katei ka kam leh beijot hapoh Rangsai police station hapoh ka Goalpara, hynrei na ka liang ki pulit kim pat shym la ioh ban kem ia utei u briew.
