Shillong, K’Lyngkot 25: U MLA barim ka Mawlai Constituency bah P.T Sawkmie hynne ka sngi balang, ula kam ba lada ka United Democratic Party (UDP) ka ioh ban thaw sorkar hadien ka ilekshon, kan sa pyndam noh iaka Memorandum of Understanding (MoU) bala iasoi hapdeng ka Meghalaya bad ka Assam ban iapynbeit ia ki jingiakajia pud ha ki 6 tylli ki jaka.
“Nga kren da kaba shai kdar ba ha ka sngi ba ka Jylla kan ioh iaka sorkar thymmai…nga kyrmen ba ka UDP kan ioh ban thaw sorkar, lad ka UDP ka ioh thaw sorkar, kan pyndam iaka MoU pynbeit pud ka Meghalaya bad Assam” ong u bah P.T Sawkmie.
Haba ban halor ka hukum ban pynmih ka Meghalaya High Court bad ka Supreme Court hadien ba don kiba la mudui pyrshah iaka MoU, u bah P.T Sawkmie ula ong “Ngim kwah satia ia ka jaka jong kiwei bad ngim dei ruh ban ai iaka jaka sha kiwei namar lada ngi duh iaka jaka, ngi duh ruh iala jinglong trai”.
U bah P.W Sawkmie ula bynrap ba ka don ka jingleh kyrkieh naka liang ka sorkar MDA ba ialam daka National People’s Party (NPP) haba iadei bad ka jingpynbeit pud.
“Ka sorkar ba ialam daka NPP kala shim rai kyrkieh palat kumba ka pyrthei kan wan noh bad dei namar kane kala don ka jingbakla hangne hangtai haba iadei bad ki rai ba ka sorkar ka shim” ula ong.
