Shillong, Jan 25: Ka jylla Meghalaya hynne ka sngi kala rakhe ia ka National Voters’ Day kaba 13, da kaba pynlong ia ki prokram bapher.
Ia katei ka jingrakhe la pynlong da ka ophis jong u Chief Electoral Officer (CEO) ryngkat ka jingiatreilang bad ka tnad Sports & Youth Affairs, ka Election Commission of India, ka Meghalaya Model United Nations ha kaba la pynlong iaka Marathon, Fashion Show bad iaka “Festival of Democracy” ha Soso Tham Auditorium ha ka 24 & 25 tarik.
La rakhe iaka National Voters’ Day 2023 halor ka phang “I vote for sure, Nothing like Voting”, ia kaba la pynwandur kum ka jingrakhe iaka hok jong ki paidbah ban jied iala ki nongialam kum ka jingbeh ia ki jingsynshar ki phareng kiba la teh mraw iaka ri da ki spah snem.
Ha katei ka jingrakhe la pynlong iaka Marathon kaba la ai kyrteng “Run for Sure, Run Strong”, ia kaba la phiah ha ki 4 tylli ki kyrdan kata ka jingmareh naka bynta 1 km, 5 km, 10 km bad 21 km.
Ia ka jingmareh kaba 21 km la sdang na Assembly kaba rim, 10 km na ka lad Nongmynsong-Pynthorumkhrah, 5 km na Dhankheti bad 1 km na Barik point bad la pynkut ia kitei ki jingmareh ha Assembly barim kaba don ha Khyndai Lad.
Nalor kane la pynlong ruh iaka Zumba, ka jingpyninam iaki kali rim, ki jingiakob ki bapher bad ka jingpynbyrngia jong ki kynhun tem bapher ha kaba la iashimbynta lang ruh da ki nongmihkhmat jong ka Super 6.
U Chief Secretary ka jylla u Bah DP Wahlang, kum u Kongsan ula ong, “Ki jingtynjuh kiba ngi iakynduh mynta ki long ki bapher bha, namar ha ki snem kiba la leit ym ju don ki Social Media. Hynrei mynta ka bor jong ki social media, ha kaban pynsaphriang ia ki video bad ki dur ki bapher bapher, kumta ki bor pyniaid elekshon kin hap long kiba peitngor bha”.
Ula ong, ka jingdonkam jong kane ka sngi, ka long ban pynkynmaw ba baroh ki nongshong shnong ha ka ri ki don ia la ka jong ka hok ban shimbynta ha ka jingthep vote, ki nongshong shnong kiba la dap ia ka 18 snem shaneng ki kham long kiba kongsan na bynta ban pyntikna ia ka hok ha ka synshar khaddar.
Katba u Chief Electoral Officer, Bah F.R. Kharkongor ula ong, “Haba ngam jylliew ha ka mat jong ka National Voters’ day mynta u snem “I vote for sure, Nothing like Voting”, kane ka thew shai ia ki riewshimet bad ia nga kum u riewshimet bad iaka kamram ban leit thep vote.
