Nongpoh, K’lyngkot 21 : Da ka jingthmu ban wanrah ia ka jingiatylli hapdeng ki paid Karbi kiba sah ha Meghalaya bad ban pynneh pynsah iala ka jong ka snap kyrpang ha Jylla, ka All Meghalaya Karbi Association (AMKA) kala pynlong ia ka Dorbar bah ba 48 ba ju pynlong shisien shisnem ha shnong Sohliyya, kaba dei kawei na ki shnong ba don sha kyndong eh ka Ri-Bhoi District.
U Executive Member ka Karbi Anglong Autonomous Council (KAAC) Syrya Rongphar, ula pynshongkun ia kane ka Dorbar bah kum u Kongsan ha ka jingiadonlang u Nonseng ka AMLA BS Teron, u President ka Karbi Students Association Samdon Teron, President ka AMKA Bistocan Timing bad kiwei kiwei ki Nongialam ba pawkhmat na ka jaidbynriew Karbi bad ki Nongmihkhmat na ki shnong bapher bapher ka Ri-Bhoi District.
Kumba la pynpaw da ki Nongialam ka AMKA, ka thong haba pynlong ia kane ka Dorbar Bah da ka AMKA, ka long ban wanrah ia ka jingiatylli hapdeng ki paid Karbi kiba shong ba sah ha Meghalaya bad ruh ban pynneh pynsah iala ka jong ka snap kyrpang bad ka deiriti kiba donkam ban pynneh kumba la aipateng da ki longshuwa manshuwa.
Ha kane ka jingialang, kila phah ruh ia ka khubor ka jingieid bad ka jingsuk kaba donkam ban hap ban pynneh hapdeng ki paid Khasi bad ki Karbi. Kila banjur ruh ban iabat ia ka mynsiem ialong shipara namar ka jingia im lang ia bam lang naduh ka por kulong kumah.
Ki Nongialam kila banjur ruh ba ki jaidbynriew Khasi bad ki Kabi kim dei ban wanrah ia kano kano ka jingsngew iapher lane sngew pher jaidbynriew naba ki Khasi bad ki Karbi kila ia imlang ym tang ha Meghalaya hynrei ha Karbi-Anglong, Assam ruh kumjuh.
Ia kane ka dorbar bah la pyniphuh iphieng da ki jingshad nala tynrai bad ki jingrwai bala iashimbynta da ki samla Karbi na ki Shnong bapher bapher ka Ri-Bhoi.
