Shillong, K’lyngkot 16 : U Myntri Rangbah ka Jylla Conrad K Sangma hynne ka sngi nyngkong, ula pyntip ba ka Sorkar Jylla dang shen, kala iohktien biang na ka kynhun Hynniewtrep National Liberation Council (HNLC) haba iadei bad ka jingiakren iasuk kaba la sdang.
Haba kyntait ban iathuh ia kiei kiba ka HNLC ka pynpaw, u Conrad ula ong “Ngi ruh ngi la nang phah ia ki jingaiktien kum ka jingpyntip bad ruh ban ioh ia ka jubab na ka Sorkar Pdeng” haba bynrap “Hadien ba ngi ioh jubab, ngin sap hah ktien sha ki bad ban pyniaid shakhmat ia ka jingiakren”.
Haba pynpaw ba ka jingiakren iasuk ka don ha ka lynti kaba beit, u Myntri Rangbah ula ong “Ngi dang iakren bad ki (HNLC) bad ka jingia aiktien ka dang iaid shaid shaid”.
Hynrei ula ong pat ba ki don katto katne ki mat kiba hap ban iasyllok bad ki katto katne ki jingpynsngew kiba don bad bala pynsngew k dei kiba kongsan bha haba pynpaw ia ka jingngeit skhem ba baroh ki kynhun ba iadonbynta ha ka jingiakren ki don ka jingkwah ban ioh noh ia ka jingsuk ba neh shirta.
“Ngi da angnud ban lah pynbeit noh ia kane ka kam bad nga kwah ban ban biang sa shisien ba na ka liang jong ka Sorkar Meghalaya, ngi kwah ba kine ki jingiakren kin iaid shakhmat bad ba ngin lah ban poi sha ka jingiabeit bad ngi iohi ba ki kam kila iaid ha ka lynti kaba dei hynrei namar ba kane ka dei ka dei kaba jyrwit jyrwat, kin don beit ki jingsngewkhia bad ka long kaba kongsan ban bteng ha kaban iakren ban pynbeit ia kine kiei kiei baroh. Nga ngeit skhem ban gin lah ban pynbeit ia kine ki ishu bad ban ioh noh ia ka jingsuk ba junom hapoh ka Jylla” ong u Conrad.
Halor ka jingdawa jong ka HNLC ban ioh ia ka jingmap noh ia baroh kiei kiei, u Conrad ula ong “Ki don katto katne ki kam kiba donkam ban iasyllok ha ki katto katne ki kyrdan, ta ka daw kam iahap ia nga ban iakren ia kane ka bynta”.
Ula pynthikna biang ba ka rai ba dang shen jong ka NIA ban khot hajir ia ki Nongialam ba hakhlieh ka HNLC, ka dei ka kam ka bym don eiei satia namar ka dei kaba hap ban leh. “Haba ka jingtohkit ka iaid, ka dei ia kaban khot hynrei kam dei pat ba kila (NIA) pynmih ia ka hukum ban kem ia ki..Ka dei tang ka jingkhot ban kylli jingkylli….Ia kine ki jingpynsngew ruh la dep ban pyntip sha Delhi. Kumba nga ong, watla ka long kumno kumno ruh ka kam, ngi la kut jingmut ban wad ia ka lynti ban ia jam shakhmat” ong u Conrad.
