Nongpoh, Nohprah 29: Ka Hynñiewtrep National Youth Movement (HNYM), Ri Bhoi District hynne ka sngi palei, kala aipor 3 sngi ia ka kompani Indradhanush Gas Grid Limited Meghalaya (IGGLM) ba kan pynbiang ia ki kot ki sla ba donkam haba iadei bad ka jingpyntrei ia ka project ksam pipe gas ha Ri-Bhoi district lem kumta kan hap ban sangeh syndon ia ka project.
Kane ka jingdawa kala mih hadien ba ka jingkam baka HNYM kala shem ba kane ka kompani kam shym la don satia ia ki kot ki sla kiba donkam ban pyntrei ia kane ka project ksam pipe gas, kiba kynthup naduh ki jingbit na ki Dorbar Shnong ne ki bor ka Khasi Hills Autonomous District Council (KHADC).
Ka HNYM Ri-Bhoi hapoh ka jingialam u President Bah Petrius Khymdeit bad ha ka jingiadonlang u Rangbah Shnong ka Nongrim Nongladaw, kala hiar jurip ia ka jingtreikam jong kane ka kompani IGGLM ha ka thain Mawbri, kaba hap ha Bhoirymbong C&RD Block bad shem ba kane ka kompani kala wan kynton ia bun bah ki pipe bad sdang ruh ban tih ia ki jaka ban tep ia kine ki pipe.
Haba kren bad ki Nongthoh Khubor, u Bah Petrius u la ïathuh, ba ka seng ka la ïoh jingtip ba ka kompani IGGLM kaba dei ban ksam ia ki pipe gas ban pynpoi sha ki Jylla ka thain Shatei Lam Mihngi, kam shym la ïaid ne bud thik ïa ki kyndon treikam kynthup naduh ka jingïoh ïa ki kot pan jingbit kum ki NOC na ki Dorbar Shnong ne na ka KHADC.
Ula kynnoh ba kane ka kompani kala wanrah ia ki nongtrei bar jylla ki bym shym la don ruh wat ia ka Labour Licence naka KHADC wat hadien shibnai bala pynsah bad sdang pyntrei ia ka kam ha Shnong Nongrim Nongladaw.
“Wat ka Dorbar Shnong Nongrim Nongladaw kam shym la ioh jingtip eiei halor kane ka kam jong kane ka kompani, kaba la pynlyngngoh shikatdei eh ia ki bor pyniaid shnong” ula ong.
Une u Nongialam ka HNYM ula pynpaw ia ka jinglyngngoh ba kane ka kompani kala treikam tang na ka jingai jingbit jong ka Ophis ka Dorbar Raid Iapngar katba ka kam pat ka dei kaba la pyntrei ha ka jaka kaba dang hap hapoh ka Raid Bhoilasa.
“Ngi aipor 3 sngi ia kane ka kompani ba kan pynbit pynbiang ia ki kot ki sla ba dei ban shim na ki bor khmih lem kumta ka seng kan shim da kiwei pat ki lynti ba tyngeh” ula ong.
