Nongpoh, Nohprah 21: Ka Joint Action Committee jong ki Nongialam Shnong ha ryngkat ki kynhun Sengbhalang kila mih ban pyrshah jur ia ka jingthmu jong ka sorkar ban pynkynriah ia ka Ophis treikam jong ka Umsning C&RD Block na Nongrim Dewlieh sah Lad Umpih.
Ia kane ka Joint Action Committee la thaw hynne ka sngi Balang da ka kynhun ki Rangbah Shnong na ki 30 tylli ki Shnong kiba hap hapoh ka Umsning Block, kiba la shong jingialang ha Lum Nongrim. Kana ka jingialang kala jied ia u Bah P Kharkrang kum u Chairman bad u Bah Dondor Marbaniang kum u Secretary.
Ia kine ki Rangbah Shnong la kyrshan da ki Sengbhalang ba kynthup ia ka HITO, HNYF bad ka CORP.
Hadien kane ka jingialang, kane ka Committee kala leit aiti ia ka dorkhas ha Block ba dawa ban pynsangeh mardor ia ka jingthmu ban pynkynriah ia ka Ophis ka Block. La rai ruh ba shen kin sa leit buh ia ka dorkhas hakhmat u Myntri ka Tnad C&RD, u Chief Secretary bad ruh u MLA ka Umsning ba kin tuklar lem halor kane ka kam.
Haba ia kren bad ki nongialam ka JAC kumjuh ki nongialam ki kynhun sengbhalang, ki la pynpaw ba ka kynhun ka pyrshah jur ia kane ka jingleh sopsop jong u BDO ka Umsning C&RD Block u Raja Brahmah u ba la thmu ban leh marwei marwei ban pynkynriah ia ka ophis ka Umsning C&RD Block na Lum Nongrim sha Lad Umpih khlem da pyndep ia ka jingpynbna paidbah bad la suba ba lah ban don kaei re kaei kaba shalyndet kaban pynmyntoi tang ia u tei u BDO ym ia ki paidbah.
Kila buh jingkylli ruh ba kumno ki bor pyniaid ka Umsning Block ki thmu ban pynkynriah ia kane ka Ophis sha Lad Umpih da kaba kam ba ka Ophis ba mynta ha Lumnongrim Dewlieh ka dei kaba khapngiah. Kila pynshai ba kane ka jaka ha Lumnongrim Dewlieh ka don haduh 10 acre haba nujor bad ka jaka ha Lad Umpih kaba don tang kumba 2 acre eiei.
Nalor kane, ka JAC kala kynnoh ruh ba u BDO ba mynta u Raja Brahmah u dei u briew uba don ia ka jingthmu kaba sniew sha lyndet da kaba pyrshang pynkynriah ia ka Ophis na Lum Nongrim. Kala kynnoh ba une u heh Ophisar ula phah pom tuh ia ki dieng kseh kiba don ha Lumnongrim bad suba ruh ba ula shalan tuh bad die tuh ia ki khlem ka jingtip jong ka Sorkar ne ki paidbah.
Namar kane, ka JAC kala dawa ia ki bor Sorkar ba dei ban pynkynriah kam noh ia u BDO ba mynta halor ka jingkynnoh ba u thmu leh donbor ia ka kam khlem da kynjoh ktien iano iano ruh.
