Nongpoh, Nohprah 19 : Ka Sorkar Meghalaya Democratic Alliance (MDA) ba ialam da ka NPP, kala lah ban pynurlong mynta ia ka jingphohsniew ba da ki phew snem jong ki Nongshongshnong ki shnong khappud ka Them Ri-Bhoi ba kan pynioh ia ka surok rong ba paka na ka shnong Umdoh 18 mer bad Pillangkata sha Maikhuli.
Kane ka jingphohsniew kala urlong ruh da ka jingtrei shitom jong u MLA ka Jirang Constituency Bah Sosthenes Sohtun uba la iai tynruh ia ka Sorkar Jylla bad ka Tnad PWD (Roads) ban pyntrei kyrkieh noh ia kane ka surok.
U MLA ka thain hynne ka sngi nyngkong, ula buh mawnongrim ban shna noh ia kine ki artylli ki surok ba kynthup ia ka surok ha Umdoh 18 mer ba kot haduh T. 3.80 klur bad ka surok na Pillangkata sha Maikhuli kaba la mang kumba T. 5.26 klur. Iakane ka jingbuh mawnongrim la sakhi lang da u MDC ka thain Bah Victor Rani, ki Ophisar ka Tnad PWD, ki Rangbah Shnong lem bad ki paid nongshongshnong.
Haba kren ha kane ka sngi, u Bah Sosthenes Sohtun, u la pynpaw ia ka jingkmen kaba khraw ban ioh pynurlong ia ka jingangnud ki paidbah , ha kaba mynta kin sa ioh pat ia ka jingsuk ha ka leit ka wan ka kit ka bah.
U la pynpaw ruh, ba kane ka sorkar jylla ba la lamkhmat da ka party NPP ka la lah shisha ban pynurlong ia shibun ki jingphohsniew jong ki paidbah nongshong shnong ha ki shnong bapher bapher ka jylla lyngba ka jingwanrah ia ki kam pynroi bapher bapher kiba kynthup naduh ki surok, ki hospital, ki jaka pule bad kiwei kiwei kiba la pynmyntoi shikatdei ia ki paidbah.
“Watla ki kam babun kum ka sorkar jylla hi ka la dep pynurlong hynrei ki jingshah kren bein kren khoh ki nang jur na kawei ka sngi sha kawei pat, khamtam ia nga kum u nongmihkhmat na Jirang Konstituensi kiba la kdew ba nga khlem leh eiei ha kine ki snem kiba la leit noh, hynrei ngam pynsngap ia kum kine ki jingkynthoh bad ka shong ha phi ki paidbah ban bishar la nga la leh aiu ha kine ki 5 snem duna naduh ba nga la shah jied da ka jingieid jingshaniah ka jong phi”, ong u Bah Sosthenes Sohtun.
