Nongstoiñ, Nohprah 19: Ka ‘Kynhun ïarap ïa kiba donkam eh’, hapoh ka jingïalam jong u Bah Lumlang Kharsyiemlieh, Bah S Marbaniang bad Bah S Shangdiar ha ka sngi saitjaiñ, ka la hiar sa sha ki thaiñ Marshan bad thaiñ Nongklung, ban ïarap sngewbha da ka ki jaiñ kup syaid shuwa ka jingrakhe ïa ka Khrismas.
Ka program sam jaiñ kup ba nyngkong la pynlong ha ka por 11 baje mynstep ha phyllaw jong ka skul ka Marshan Namlang, ha kaba la sam kumba 35 tylli ei ei ki jaiñ kup blanket la sam sha ki longïing ba kynthup ïa ka shnong Marshan Namlang, Marshan Nongrim, Pyndensohphoh, Thynrangkhmahjah bad Pyndenmawbah.
Hadien kane la leit ban sam sa sha ki 42 ki longïing na ka shnong Nongklung bad Nongklungrim.
Ha kane ka jingsam jingiarap la iadonlang ki nongïalam Shnong bapher bapher, ki samla rangbah ka thaiñ bad ki paitbah. Haduh mynta ka Kynhun ka la dep sam kumba 16 shnong, kata tang na ka bynta kito kiba donkam eh ban ïarap.
