Shillong, Nohprah 15 : Ka Khasi Students Union (KSU)-North Khasi Hills kala dawa ia ka Sorkar Meghalaya Democratic Alliance (MDA) ban buh ia ki Border Oupost ha ki shnong Block-II haba pynrem ruh ia ka jingkam u Symbud Myntri Rangbah ba ki 22 tylli ki shnong ha Block-II ki dei kiba hap sha Jylla Assam.
Ka KSU-NKH hapoh ka jingialam u President Bah Ferdynald Kharkamni kala dawa ia kane namar ka jingjia ha Umsaw Lumdorbar, Block-II, kaba la pynshongsyier ia ki paradoh parasnam na ka jingwan pynibor ki Pulit Assam bad ka Tnad Forest ka Assam.
Ka KSU kala kyrshan ruh ia ka jingdawa jong ka Synjuk ki Rangbah Shnong ka thain Khappud ba dawa ia ka Sorkar Jylla ban ym buh ia ka BOP ha shnong Thadrang ne Raid Tyrso hynrei ban buh ha Shnong Ummat bad Umtlih.
“Ka rai jong ka Sorkar kam iahap satia namar ka Thadrang bad ka Tyrso ki dei ki shnong kiba don hapdeng ka jingshong suk shongshngain. Ngi dawa ba ka Sorkar ka dei ban pynurlong ia ka jingthrang jong ki paidbah kiba sah ha ki thain khappud namar ki tip kham bha ia ki jinglong jingman baroh” ula ong.
Kat kum ka jingong jong u, ka Assam ka la buh ia ki BOP ha Umru, Madan Umwang bad Umlaper bad ka KSU ka kwah b aka Meghalaya ruh ka dei ban buh 4 ne 5 tylli ki BOP ha ka thaiñ Madan Umwang, Umtlih, Umlaper.
Ula ong ba lada ka Sorkar ka donkam ïaki briew ban shna ïaki jaka sah jong ki pulit, naka liang ki dkhot ka KSU ki kloi ban mih ban pynshna wat ban pahara ha katei ka thaiñ.
Une u Nongialam ka KSU ula kynthoh tyngeh ia ka jingkren u Symbud Myntri Rangbah Bah Prestone uba la kam ba ki 22 tylli ki Shnong ha Block-II ki dei kiba dang hap sha Assam.
U Symbud Myntri Rangbah ula pynpaw ia kane haba jubab ia ki jingkylli ki nongthoh khubor shabar jong ka jingialang ha shnong Umskun, Ri-Bhoi ha kaba ula pynpaw ba ka Sorkar Jylla kan pyrshang katba lah ban pynioh pat ia kine ki shnong ha Meghalaya ha ka jingiakren pynbeit pud jong ka wat kaba ar.
“U DyCM u dei ban puke kot bha ne leh Homework ym ban shu kren laplah halor kine ki shnong ha Block-II” ong u Bah Ferdynald Kharkamni haba iakren bad u nongthoh khubor.
“Baroh ki paid nongshongshnong jong kine ki 22 tylli ki Shnong ha Block-II ki dei ki Khasi bad ki kwah ban don beit sha Meghalaya. Kim kwah satia ban shah kynthup sha Assam ha ka jingakren pynbeit pud jong ka wat kaba ar” ula bynrap.
Kat kum ka jingong jong une u Nongialam ka KSU, “Nga kwah ban pynkynmaw ïa u snem 1951 haka por ba phiah ïa ki Autonomous Counil jong ka United Khasi Jaiñtia bad Mikir Hills ba hangto ngi la iohi shai lyngba ki kot ki sla ba ka Mikir Hills ka dei shaduh khmat jong ka shnong Ummat kaba dei shakhmat ka wah Umiam bad ki don tang kumba 18 tylli ki shnong ym 22 tylli kumba ong u Bah Prestone. Kitei ki 18 tylli ki shnong da ka bor kila shah pynhap noh sha ka Block II” haba bynrap “U Bah Prestone u dei ban pule bha ïa katei ka kot jong u snem 1951 bad ban leh Homework bha shuwa ban kren paidbah”.
U Bah Ferdynald ula ong “Ka jingkam jong u Bah Prestone ba kine ki 18 tylli ki shnong ki hap sha ka Assam ka dei ka jingkren ban pynduh mynsiem ia ki paidbah jong ngi kiba sah ha kine ki thain khappud kiba dang angnud hirhir ba ka sorkar jylla Meghalaya kan nym pynhap ia ki shapoh ka jylla Assam”.
“Kumno kine ki Shnong kin hap sha Assam haba kim ioh eiei na Assam naduh ki kam pynroi ne kiwei kiwei ki jingmyntoi bad haduh mynta kine ki Shnong ki don ia ki EPIC ha Jylla Meghalaya (dang thep vote sha Meghalaya)” ula buh jingkylli.Une u Nongialam ka KSU ula ong ba ha u snem 1951, u Lat ka jylla ula pynhap jubor noh ia kine ki shnong sha Mikir Hills.
