Tura, Nohprah 15 : Ki Pulit ka North Garo Hills bad na Goalpara, kila ioh ban kem ia ka kynhun ki Nongtuh kali ba kynthup ia u Nongialam (kingpin) bad ioh ruh ban kurup ia kawei ka kali tuh.
Kat kum ka khubor, la iathuh ba ha ka 26 tarik Risaw 2022, ki Pulit kila ioh pdiang ia ka ejahar na u Dolrich M Marak ba pyntip ba ka kali jong u, ka Maruti ba don u nombor AS-18-9833 kala shah tuh ha ka miet 24 tarik Risaw bad ia kane ka jingjia la register case ha Williamnagar Police Station.
La iathuh ba ha ka 13 tarik mynta u bnai, la don ba iohi ia kane ka kali ha Assam ha ka Iingsah jong uwei u briew ba kyrteng u Senggin Shira ba na Phutimari, kaba hap hapoh ka Krishnai Police Station, Assam, ia kaba la suba jur ba u dei uba donkti ha kane ka case.
Ia kane ka kali la leit kurup noh bad ia une u briew ruh la ialam noh sha Williamanagar Police Station ban tohkit bad halor ka jingphla jong u, ki Pulit kila ioh ban kem ia arngut ki briew.
