Shillong, Nohprah 13 : Kum shibynta na ka jingrakhe ia ka jingwan jong ka Khristmas, ka Chairperson ka All India Trinamool Congress (AITC) Mamata Banerjee ka la leit iashimbynta ha ka Peace & Goodwill Concert bala pynlong da ka TMC hynne ka janmiet sngi ba-ar ha Windermere Resort, Shillong lem bad kiwei ki kynrem ki lyndan bad ki nongshah khot sngewbha.
Kane ka jingrakhe kala sdang da ka jingduwai bala shim ia ka bynta da u Father Richard jong ka All Faith Forum bad la pynbud pat da ki jingrwai niam da ka kynhun Choir na Nagaland ka En Tribe, ka Abdiel na Mizoram bad ka KHMIH na Meghalaya.
Nalor kane ka jingrakhe, ka Mamata Banerjee kala iashimbynta ha kiba bun ki jingpynbyrngia bad ki Khynnah kiba wan na ki jaka ri khunswet bapher bapher.
Kala iakynduh ruh ia ki Rangbah Shnong na Ri-lum Khasi bad Jaintia, ki riew pawkhmat ka imlang sahlang bad kiwei Iiwei, kiba wan ban iashimbynta lang ha kane ka jingrakhe.
Kane ka Nongialam ka AITC kala pynmeh ruh ia u dieng Khristmas bad ot ia u cake ban iabam sngewbha.
Kala ai khublei ia baroh kiba wan iashimbynta ha ka jingrakhe. “Nga ai ka jingieid bad ka jingkitbok ia baroh ki Khynnah, ki dei ki nongkynti bad ka lawei jong ka Ri jong ngi” ong ka Mamata haba aiti ia ki jingaisngewbha sha ki Khynnah.
Haba pynpaw ba ka dei ka burom ia ka ban iadonbynta ha kum kane ka jingrakhe, kane ka Myntri Rangbah ka West Bengal kala pyntip ba ka Sorkar jong ka ruh kala pynlong ia kum kane ka jingrakhe ha Kolkatta. “Ngan sa plie ia ka jingrakhe Khristmas ha Park Street ha ka 21 tarik u Nohprah” kala bynrap.
