Shillong, Nohprah 12 : Ka Bharatiya Janata Party-North Shillong Mandal, ha ka 11 tarik Nohprah kala pynlong ia ka jingia lang ha Talents Club ban pynshai paidbah ia ki skhim jong ka Sorkar Kmie bala mang sha ki Nongshongshnong ka Jylla bad ka Ri baroh kawei.
Ki Nongshongshnong ba don kumba 300 ngut na ka thain Bevar Road bad Sawforlong kila wan ban iashimbynta ha kane ka jingialang ban sngap ia ki jingialap jong ki Nongialamka Party halor ki mat treikam jong ka Party na ka bynta ka elekshn MLA-2023.
U Bah M Kharkrang, Ophisar IPS bala shongthait uba dei ruh u Nongaiktien ka BJP, ula ai ia ka jingbatai ba bniah halor ki skhim bapher bapher jong ka BJP kaba lam sha ka jingkyntiew ia ka ioh ka kot ki paidbah khamtam sha ki longiing kiba duna ka kamai ka kajih ha ki Jylla ba synshar ka BJP.
Lah ban kdew hangne ba u Bah Kharkrang u dei uwei na ki Rangbah uba la pan ia ka ticket na ka BJP ban mih iakhun ia ka elekshon MLA-2023 na North Shillong Constituency.
Kane ka jingialang kala ai mynsiem ia ki nongwan iashimbynta ba kin iasoh noh sha ka BJP bad ban rai kut ha kaban pynthikna ba u kyrtong ka BJP na North Shillong un ioh ia ka jingjop ha ka elekshon ban wan.
