Ka Assam ka roi sted bha naduh ba synshar ka BJP, ong u Dr. Shyamal Saikia
Nongstoiñ, Nohprah 9: Kum shibynta jong ka jingpynkhreh їa ka election MLA-2023, ka Bharatya Janata Party na Delhi, ha ka sngi thohdieng ka la phah їa u Dr. Shyamal Saikia sha Nongstoiñ ban їakynduh їa ki nongїalam jong ka BJP Nongstoiñ Mandal, ba un pynshai ha ki їa kiba bun ki mat treikam ba kin leit sha ki paitbah ha ka por ialap election.
Lah ban kdew hangne ba u Dr Saikia u dei uwei na ki nongpeit pyrman jong ka BJP, u ba la thung na ka bynta ba un peit їa ka jinglong jingman jong ka party ha ki jylla jong ka thaiñ shatei lam mihngi, ba kynthup їa ka Assam, Meghalaya, Manipur, Mizoram, Arunachal Pradesh Tripura bad kiwei kiwei ki jylla bad u shong u sah ha Guwahati.
U Dr Saikia u dei ruh u heh pulit u ba la shong thait bad u ba la bat teng kum u SP jong ka Kamrup Distirct. U la shah pynkiew haduh ka kyrdan Additional Inspector General of Police jong ka sorkar Assam bad hadien ba u la shnong thait u la shah jied kum u nongpeit pyrman jong ka Bharatya Janata Party.
Ia u Dr Saikia la synran lang da u bah David Kharsati Vice President ka BJP Meghalaya, u bah W.Marbañiang bad kiwei kiwei ki nongїalam jong ka BJP. La pynlong ruh їa ka jingїalang ha ka ophis treikam jong ka party ha Upper New Nongstoiñ, ha kaba bun ki paitbah bad ki dkhot na kylleng ki shnong ba kynthup їa ki samla, ki longkmie bad ki rangbah ki la wan ha katei ka jingїalang.
U bah David Kharsati u la ong ba ha kane ka election ba dang shu dep ha Gujarat, ka Congress ka la pyrshang katba lah ban theh da ka pisa bad ka thong ka long ban pynrem kput їa ka BJP hynrei kam shym la lah satia. U la ong ruh ba uno uno u ba thmu ban rung sha ka BJP bad ban їaleh elekshon na ka bynta ka jingmyntoi shimet jong u, yn ym don jaka satia namar ka thong ba hakhmat eh jong ka BJP, ka long ban shakri їa ki paitbah da ka hok khlem kano kano ka jingbam sap.
U Dr Shyamal Saikia u la ong ba naduh ba ka BJP ka la їoh ban synshar ha Assam, ka roi ka par ka la kiew sted bha, ka jingїoh kam їoh jam jong ki samla ka la kiew sted bha, ki longkmie ki la їoh shibun bah ki jingmyntoi lyngba ki skhim bapher bapher ba ka sorkar pdeng ka la ai na ka bynta jong ki.
U la ong ruh ba ha Meghalaya, ka Sorkar Pdeng ka la mang pisa kyrpang haduh ar lak tyngka na ka bynta kawei ka longїing kaba duk tasam ban shna їa ki їingsah kiba bha. Їa katei ka pisa la phah lyngba ki Bank account jong ki khnang ba kan ym don kano kano ka jingshah khate haba ki leit ban sei їa ka pisa na ka bynta ban thied їa ki tiar ki tar kiba don kam ha kaba shna їa ki їing ki sem jong ki.
U la ong ba kawei pat ka skhim kaba kyrpang ba u Myntri Rangbah Duh Narendra Modi u la leh bha їa ki paitbah nongshong shnong, ka dei ka skim ban pynpoi umbam umdih ha man la ki thliew їing kaba la tip kum ka Jaal Jivan Mission (JJM). Hynrei kaba lyngngoh pat ka long ba kane ka sorkar Meghalaya kam shym la pyntrei kam hok, namar katkum ka jingtip ba u la їoh na ki paitbah ka long ba wat la ki pipe ki la poi ha man ki thliew їing ruh kim їoh um satia.
U la ong ruh ba katei ka jingbym їoh um ka dei namar ka jingtorti jong ki nongpyntrei bad ka jingpyndon kam bakla jong ka sorkar їa ka pisa ba la mang da ka sorkar pdeng. U Dr. Saikia u la kyntu ruh їa ki paitbah ba halor ka jingbym poi thikna jong ka umbam umdih ha ki їing ki sem jong ki, kim dei ban ailad hynrei ki dei ban pyntip sha ki nongїalam jong ka party, khnang ba kin phah їa ka kaiphod sha u ba un pyntip sha Delhi bad ka sorkar pdeng kan leh їa kaba donkam.
Hadien ba la wai ka jingїalang kum ka dak jong ka jingsngewkmen na ka bynta ka jingjop ha ka election ha Gujarat, ki la pynlong їa ka jingthang bom pataka ha jrong jong ka mala jong ka ophis treikam.
