Shillong, Nohprah 09 : Kum ka jingbteng ban iai pyrshah ia ka Citizenship (Amendment) Act, 2019, ka North East Students’ Organisation (NESO) kala rai ban sieh lama iong bad wah banner iong ha man ki jaka ba kongsan ha baroh ki hynniew tylli ki Jylla jong ka Thain Shatei Lam Mihngi ha ka 11 tarik Nohprah.
Ha ka kyrwoh, u Chairman ka NESO Bah Samuel B Jyrwa ula ong ba ka Synjuk kala pynbna ia ka 11 tarik Nohprah ba kan long ka sngi ban kynmaw kum ka sngi bad um ngit (Black Day) ia baroh ka thain Shatei Lam Mihngi.
“Namar kata, kum ka jingbteng ban kynmaw ia kane ka sngi bad um ngit, ka NESO kala rai ba kan pynlong ia ka jingsieh lamaiong bad banner iong ha man ki jaka ba kongsan jong baroh kihynniew tylli ki Jylla ka thain” ula ong.
U Bah Samuel ula ong ba ha ka 11 tarik Nohprah 2019, wat hapdeng ka jingpyrshah khlem shongthait jong ki paid riewlum ka thain Shatei Lam Mihngi ia ka Citizenship (Amendment) Bill, 2019, ka Sorkar India kam shym la pynsngap bad khatduh lyngba ka Rajya Sabha, kala mynjur ia kane ka ain Iakjakor kaba la tip kum ka Citizenship (Amendment) Act, 2019.
“Ka jingkynmaw ia kane ka sngi ka long eh ban phah khubor sha ka Sorkar India ba ngi dang pyrshah ia ka Citizenship (Amendment) Act 2019 bad ha kajuh ka por ban pynkynmaw ia ki briew jong ngi ia ka jingleh bym shonghok jong ka Sorkar India pyrshah ia ki paid riewlum jong ka thain Shatei Lam Mihngi” ong u Bah Samuel.
Ha kajuh ka por, ka NESO kala wer ia ki paidbah ka thain ba kin kyrshan ia kane ka jingiakhih bad ha kajuh ka por ban iai iakhun iala ka jong ka hok bala ai ai da u Blei.
