Shillong, Nohprah 09 : Ka Bharatiya Janata Party (BJP)-Meghalaya, kala ther tyngeh ia ka All India Trinamool Congress namar ka jingbym lah ban trei ne shim ia ka bynta kum ka Liang Pyrshah hapoh ka Jylla.
Kane kala mih na u President ka BJP-Meghalaya Bah Ernest Mawrie uba la kynnoh ba ki ishu bala shim da ka AITC kum ka Liang Pyrshah ha Jylla, ki dei ki ishu bala kren ne pynsngew da ka BJP.
“Man ki ishu kam bamsap bala sei madan da ka BJP mynta la shu pynbud da ka AITC” ula ong haba bynrap “Ha ka jingshisha ki dei ma ki (AITC) ban sei madan ia kiei kiei baroh, hynrei ki khlem leh iala ka bynta kat kum ka Riti Synshar ka Ri”.
Halor ki jingkynnoh bamsap ia ka Sorkar MDA ha man ki rynsan jingialang mynta, u Bah Ernest ula ong “Ka Liang Pyrshah ka don iala ka bynta ban leh eiei ha ka Iingdorbar thain ain hynrei ki kham smat pynban tang ha ki lad pathai khubor bad ki kot khubor”.
“Balei ba ka AITC kaba dei ka Liang Pyrshah kala ialap pyrshah ia ka kam bamsap tang mynta bala jan ka Elekshon” ula buh jingkylli.
