Buh ia ki BOP ha ki shnong ba iakajia pud ym ha Tyrso ne Thadrang
Shillong, Nohprah 06 : Ka Khasi Hills Autonomous District Council (KHADC) kala kyrpad ia ka Sorkar Jylla ba kan ai mynjur ia ka jingdawa jong ka Raid Nongtung ban buh ia ka Border Outpost ha Umlaper lane Ummat bad ha Umtlieh ym ha Shnong Tyrso ne Thadrang.
U Chief Executive Member (CEM) ka KHADC Bah Titosstarwell Chyne ula phah da ka shithi sha u Myntri kam Pohiing ma Lahkmen Rymbui bad pynpaw ia ka jingsngewnguh ia ka Sorkar Jylla kaba la nud ban shim ia ka rai ban pynieng ia ki Police Station, Police Outpost bad Border Outpost (BOP) ha ki jaka khappud ka Jylla bad Assam ban ai jingiada bad jingshngain ia ki nong Meghalaya ba sah ha khappud.
U CEM ula pynpaw ba ula phah ia kane ka shithi halor ka jingiohpdiang ia ka jingthoh na ka Synjuk ki Rangbah Shnong Border Area ka Raid Nongtung, Khyrim Syiemship bad kumjuh ruh na ka Dorbar u Syiem bad Basan ka Raid Nongtung, ka Ophis ka Shnad Raid Tyrso bad Ophis ka Raid Thandrang, kiba la pynpaw ia ka jingpyrshah kaba jur ia ka rai jong ka Sorkar ban pynieng ia ka BOP ha Tyrso bad Thadrang.
Kat kum kane ka shithi, kine ki Raid kila dawa ia ka Sorkar ban pynieng ia ka BOP ha Umlaper ne Ummat bad ha Umtlieh bad ban buh ia ki Pulit ba ym duna ia ka 50 ngut kiba biang bad ki tiar ki tar ka juk mynta bad ka hukum ba shah ia ki ba kin pyndonkam ia ki tiar siat ban iada ia ki paid Khasi lada don ki jingwan thombor kiba nabar.
“Nga kyrpad ia ka Sorkar ban mynjur ia ka jingdawa kine ki Khlieh Nongsynshar ka Raid Nongtung bad ai jingmut ruh ban ialeh ha kaban buh ia ka BOP ha ki jaka ba jur ka jingiakajia bad haba phai sha ki jaka ba hap hapoh ka raid Nongtung, Ri-Bhoi District, nga ai jingmut ban buh ia ka BOP ha Umlaper lane Ummat bad ka Umtlieh”.
