Shillong, Naiwieng 29 : U Myntri Rangbah ka Jylla Conrad K Sangma hynne ka sngi ba-ar, ula kyntu ia baroh ki seng sain pyrthei ba kin sangeh ia ka jingleh politics bad ki jingkynnoh briew halor ka jingjia ha Mukroh, West Jaintia Hills hynrei ban iatreilang ha kaban wanrah biang ia ka jinglong jingman ba jai jai hapoh ka Jylla.
U Myntri Rangbah ula kynthoh ia kane halor ka jingdawa jong ki katto katne ki seng sainpyrthei ban hiar shuki ia u Myntri kam Pohiing ka Jylla ma Lahkmen Rymbui namar ka jingjia ha Mukroh, ha kaba 6 ngut ki briew kila iap na ka jingther kuli jong ki Pulit ka Assam, kaba jia ha ka 22 tarik Naiwieng.
“Nga sngew shimet ba kane kam dei ka por ban kynnoh iano iano lane ban pyrshang ban peit ia ki jingmyntoi ialade ha ka kam sain pyrthei na ka jinglong jingman. Kane ka jingjia kaba ktah jur bha ia kaba la jia khlem ka dak bad jingkhmih lynti” ong u Conrad haba iakren bad ki nongthoh khubor.
U Myntri Rangbah ula pyntip ba ka Sorkar Jylla kala shim ia bun ki sienjam ban pynjai jai noh ia ka jinglong jingman bad ha kum kine ki khep, ngi donkam ban iawanlang bad iatreilang kum ki nongshongshnong ka Jylla.
“Kum ki Nongialam, nga sngew ba ngi donkam ban buh shadien ia ka jingleh politic bad iatreilang shisha kum ki nongialam ka Jylla ban wanrah biang ia ka jinglong jingman ba jai jai bad ban pynthikna ha kaban lah pynjanai noh ia ka jinglong jingman bad ruh ban pynthikna ba ki rai kum ka jingbuh ia ki BOP bad kiwei ki sienjam ki dei kiba la shim na ka bynta ka bha ka miat jong ka Jylla khnang ban kiar noh na kum kine ki jingjia hadien habud” ula ong.
Halor ka jingkwah synshar President ka AITC ha Meghalaya, u Myntri Rangbah ula ong ba ki don ki khep bad ki jingjia kiba jia hynrei kane kam dei ka por ba ngin iaid da ka nongrim ba ngi ieng”.
“Ngi donkam ban iatreilang bad hooid ngi la iohi ba wat ka imlang sahlang kala wad ia ka jingsuk. Wat ki Iingmane bad ki Balang kila wan lang, ki nongshongshnong bad ki riew rangbah kila wan lang, ki khlieh nongsynshar kila wan lang bad baroh kila kyntu ba ngi donkam ban iatreilang ban lah pynneh ia ka jingshongsuk”.
“Kane kam dei ka por ba ngin iaid sha ka kam sain pyrthei, ka elekshon kan sa wan bad hadien ka elekshon ngi lah ban iakren kat kaba ngi mon hynrei ia mynta hi, ka long kaba kongsan ba kum ki nongialam ngi dei ban iadonlang na ka bynta ka bha ka miat jong ka Jylla bad ki nongshongshnong” ula ban jur.
