Shillong, Naiwieng 24 :Ki kynhun Sengbhalang kila dawa ia ka Sorkar Jylla ban pynkha noh ia ka kynhun Pulit Special Border Police, ki ban ap pahara beit thik tang ha ki jaka khappud jong ka Jylla Meghalaya bad Assam bad ban ialeh pyrshah ia ka jingkyntur pud jong ki Pulit Assam.
Kane ka jingdawa kala mih naka jingiashong kyllain mungor jong ki san tylli ki Sengbhalang, ban pynpaw ia ka jingpyrshah halor ka jingshah siat iap ki 5 ngut ki briew ha ki Pulit ka Assam myn ha ka step sngi ba-ar ha Mukroh, West Jaintia Hills.
Ia kane la pynbud pat da ka jingiathang mombiti ban kynmaw burom ia kine kiba khlad ha kaba da ki spah ngut ki dkhot ki san seng-ka KSU, FKJGP, RBYF, HNYF bad JSU kila iashimbynta.
Haba kren ha ka jingialang, U General Secretary ka KSU samla Donald V Thabah ula ong “ Lada ka Sorkar ka kloi ban shim ia ka jingbahkhlieh, ai ba kan wanrah ia ka Special Boder Police Force bad thung ia u DIG ba kyrpang ban lah ai jingiada pura ia ki paidbah kiba sah ha ki jaka khappud bad ka Assam”.
Ula ong ba ka Sorkar Jylla kala pynlut klai bha ia ka pisa ha kaba thaw ia ki Pulit ba kyrpang hapoh ka Jylla.
“Ka Sorkar ha ka jingiakhun pyrshah ia ka HNLC kala pynkha ia ka Special Operation Group (SOG), Special Operation Team (SOT) SWAT bad SF-10. Mynta kala bunkam ban thaw ia ki Special Team hynrei baroh kine ki kynhun la shu buh ha Shillong ha ka jaka ban phah sha ki jaka khappud ban iakhun ia ki kam thombor ka Assam” ula ong.
Une u Nongialam ka KSU ula ong ba kine ki Kynhun Pulit ha Shillong ki bunkam ym ban iada ia ki paid riewlum hynrei ki dei kiba iada ia kiwei pat ki jaidbynriew.
Haba pynpaw baka Nongbah Shillong kam donkam ia kine ki kynhun Pulit namar ki briew ki lah ban iada dalade ialade, ula ong “Ha u 1979, kim dei ki Pulit kiba beh ia ki nong Bangladesh na Shillong hynrei dei ki Khasi. Namar kata, Ngim donkam ia ki, ngi lah ban iada hi dalade”.
Ula ong, haba peit iaka jylla Mizoram ki pulit ka Mizoram ki shim iaka jingkitkhlieh ban iada iala ka jong ka ri bad jaidbynriew bad wat ha Nagaland ruh lada don kano kano ka jingkyntur pud jongka jylla Assam, ki kynhun bapher ki sei iala ki suloi ban siat ban iada iala ka jaidbynriew hynrei ia u paidbah Khasi ym don nongiada.
U Nongialam ka KSU ula ong, kaba thamula ba wat haba ki pulit Assam kila siat ia ki 5 ngut ki rangbah Khasi, ka sorkar jylla kala pynsyrtap da ki pulit ha kylleng ki jaka jong ka nongbah Shillong bad ka sorkar Meghalaya kala iakhun pyrshah iaka sorkar Assam da kaba khang pynban iaka Internet ha ka jylla.
U President ka FKJGP u bah Dundee Cliff Khongsit ula ong, ba kine ki jingjia ki iai jia na ka por sha ka por namar ka jingbym shim khia ka sorkar ia ki jaka khappud.
“Ki kynhun sengbhalang kila dawa na ka sorkar ba kadei ban buh noh ia ki Police Outpost ha ki khappud ym dei ban duna na ki 1 Km khnang ba kin ai jingiada ka jingiada ia ki shnong ki thaw bad ia ki paidbah kiba sah ha khappud hynrei haduh mynta ka sorkar kam shym la buh satia ia ki Police Outpost,” ong u bah Dundee.
Katba u President ka HNYF u Bah Sadon Blah ula ong ka sorkar kam dei ban pyrshang ban pynbeit ia u pud u sam da ka snam hynrei kadei ban pynbeit da ka jingsuk bad ka jingiahun lang jong baroh.
Ula ong, ka sorkar jylla kam dei ban kut tang ha ka jingai ejahar hynrei kadei ban leit kem mardor ia ki pulit Assam kiba donkti ha kaban siat iap ia ki mynsiem briew namar kila leh ia katei ka kam hapoh u pud u sam jongka jylla Meghalaya.
U Bah Sadon ula maham da kaba ong, “Ym dei tang ki pulit Assam bad Meghalaya kiba nang ban bat ia ka ktang suloi hynrei ngi ruh ngi nang ban bat bad ngi la ju pynsawa ia ka ktang suloi,” ong u bah Sadon.
Ha katei ka jingialang la ioh ruh iaka jingkren na u General Secretary ka JSU u samla T Suchen, u President ka RBYF u Bah Bipul Thangkhiew, ka President jong ka STIEH ka Kong Purity Phawa, u nongialam ka Naga Students Union,Shillong bad kiwei kiwei.
Hadien kane ka jingialang, ki nongialam sengbhalang ryngkat bad ki paidbah kila pynlong iaka jingthang mombati kum shi bynta ban sngewlem iaka jingshah siat jong ki 5 ngut ki rangbah Khasi haki pulit Assam ha ka shnong Mukroh, WestJaintia Hills District.
