Pynrem jur ia ka jingleh mradkhlaw ki Pulit Assam ha Mukroh
Shillong, Naiwieng 23 : Ka Hynniewtrep National Liberation Council (HNLC) kala ai jingmut ia ka Sorkar Jylla ban pynlong kongsan ia ki riew paidbah ba kin hap rungkam Pulit ha kaban shakri ia ka Jylla kaba ki ong ha ka ktien nongwei ‘Conscription’ ban lah ai jingiada ia ki nongshongshnong ha ki jaka khappud.
Kane ka jingai jingmut kala mih shisngi hadien ka jingshah siat iap ki 5 ngut ki riew paidbah jong ka shnong Mukroh, West Jaintia Hills ha ki Pulit ka Assam hynnin ka sngi ba-ar.
Ka HNLC kala pynpaw ia ka jingbitar halor ka jingleh mradkhlaw jong ki Pulit Assam ban pynrem jur ruh ia ka jingsiat pathar khlem jingisynei ia ki paid Khasi kiba sah ha Block-I.
“Kane kam dei ka sien ba nyngkong ba ka Sorkar Assam kan thombor bad siat iap ia ki briew jong ngi ha khappud…ka daw tynrai baroh ka dei namar ka Sorkar Meghalaya ka long kaba tlot” ong u Bah Sainkupar Nongtraw, General Secretary bad Publicity Secretary ka HNLC ha ka kyrwoh.
Haba pynpaw ba ka Sorkar Meghalaya ka dei ban sngewthuh ha kaban leh iala ka jong ka kamram lada ka Sorkar India kam don mon ne kam lah ban weng ia ki jingeh ka Jylla halor u pud u sam, u Bah Sainkupar ula ong “Lada ka Jylla ka sngewthuh ba ka duna ha ki bor Pulit, kala dei ban pynrung kam Pulit ia ki riew paidbah ka ban long ha ka dur jong ka ‘Conscription’ (pynlong kongsan ia ki paidbah ban rung pulit kum ka jingshakri ia ka Jylla) kumba pynrung kam shipai ha kiwei ki Ri khnang ban wanrah ia ka jingshongsuk shongshngain khamtam ha khappud lym kumta ngin sa long kum ki nong Palestine ban shu kylla phetwir kha ma kha hala ka jong ka Ri”.
Une u Nongialam ka HNLC ula ong ba ka Jingkam jong ka Sorkar Assam ba ka Mukroh ka hap hapoh ka West Karbi Anglong ka pyni shaikdar ba kane ka jingjia ka dei ka kam kaba ki lah pynkhreh bha khnang ba ki paidbah kito ki thain kin sheptieng bad rung noh sha Assam haka kylla kaba ar haka jingpynbeit pud ki 2tylli ki Jylla.
“Ka Jylla Meghalaya ka lah ioh iaka iing kaba khlem u pud u sam, bad ka jingmynthi ka Sorkar kmie ban pynbeit ia u pud u sam ka lah wanrah pynban iaka jingiaumsnam ym tang ha Meghalaya hynrei ha kylleng ka thaiń shatei lam mihngi” ula ong haba bynrap “Kane imat ka lah dei lypa ka kam ialehkai haka sain hima(political game) ka sorkar kmie khnang ban pyntlot bad ban khanglad iaka jingiatylli ha kine ki Jylla ha Northeast”.
U Bah Sainkupar ula pyntip ba ka mat ban ioh iaka Jingithuh na bynta ka iing lajong bad u pud u sam ba tikna ka bri u Hynńiewtrep ka dei ka jingdawa kaba hakhmat eh jong ka HNLC.
“Ngi kyrmen ba kane ka jingiakren iasuk bad ka Sorkar kan long kaba seisoh khnang ba ngin lah noh ban weng iaka jingeh ka Jaidbynriew” ula ong.
“Lada jia ba kane ka jingiakren kam biang,ka jingialeh jong ka HNLC kan dangiai bteng wat lada kan shimpor sa 35 tylli ki snem. Lada ka jingsuk ka mut ba ngi hap ban kbum iala ka shyntur haka saw ka sian, ngim kwah ia kata. Lada ka jingsuk ka mut ba ngi hap ban shu ieng pdeng halor ka jinglehbymhok(injustice)ia kata ruh ngim kwah namar ka jingsuk kiba dangim ka pher naka jingsuk kiba lah iap” ula bynrap.
