Shillong, Naiwieng 23 : Ki san tylli ki Sengbhalang ka Jylla hynne ka sngi Balang kila rai ban pynlong da ka jingiashong kyllain mungor lashai ka sngi palei ha baroh kawei ka Jylla bad ka Non Cooperation Movement ha ka 25 tarik Naiwieng, ban pynbor ia ka Sorkar Jylla ba kan leh da kaba tyngeh halor ka jingshah siat iap ki 5 ngut ki paidbah ha ki Pulit Assam hynnin ka sngi ba-ar ha Mukroh, West Jaintia Hills.
Ia kane ka rai la shim ha ka jingialang bala iashimbynta da ki Nongialam jong ka Khasi Students Union (KSU), Federation of Khasi Jaintia and Garo People (FKJGP), Hynniewtrep National Youth Front (HNYF), Ri Bhoi Youth Federation (RBYF) bad ka Jaintia Students’ Union (JSU).
Haba iakren bad ki nongthoh khubor hadien ka jingialang, u President ka FKJGP Bah Dundee C Khongsit ula ong “Ngi la rai ban pynlong ia ki jingiakhih ba jai jai ban pynrem ia ka jingpyniap ia ki 5 ngut ki riew paidbah da ki Pulit ka Assam”.
Ula pyntip ba ka jingshong kyllain mungor kan long hakhmat u Mot jong u Kiang Nongbah hajan Shillong Civil Hospital lashai ka sngi palei. Yn pynbud ia kane da ka jingthang mombiti kum ka dak ka jingsngewlem bad ki bahaiing hasem jong ki lanot kiba iap ha kane ka jingjia ha Mukroh.
“Ngi dawa jur ia ka Sorkar Jylla ban pynthikna ba ki lanot kin ioh ia ka jingbishar kaba hok” ong u Bah Dundee.
Une u Nongialam ka FKJGP ula kyrpad ruh ia baroh ki Nongtrei Sorkar ba kin iashimbynta ha ka non-cooperation movement ka ban long ha baroh kawei ka Jylla ha ka 25 tarik Naiwieng.
“Kane ka dei ka jingphah khubor kaba shai ba ka por kala dei ia ka Sorkar Jylla ban shimkhia ia ka jinggjia ha Mukroh namar kane kam dei ka sien ba nyngkong ba ki nongshongshnong ka Jylla kiba sah ha khappud, kila mad ia ki kam thombor jong ki Pulit Assam” ula ong.
“Ngi la iohi ia kum kine ki jingjia ha u snem 2010 ha Langpih bad haduh mynta ki lanot kim shym la ioh ia ka jingbishar kaba hok. Namar kata ngi dawa ia ka Sorkar Jylla ban shimkhia bha ia ka jingjia Mukroh bad ka Sorkar India bad ban dawa ruh ia ka Sorkar Assam ban aiti ia ki Pulit kiba donkti ban siat iap ia ki riew paidbah” ula ong.
