Gangtok, Naiwieng 23 :Ha ka jingjia kaba la wanrah ka jingsngew bynniaw, uwei u heh ka tnat shipai ba kyrpang u Lhagyal ula duh ei la ka jingim namar ka jingbym plie ka parachute ha ka por ba ki dang pynlong ia ka jingkilan met ha Sikkim.
U Lhagyal 40 snem rta u dei u nong ryngkoh ne jumper uba la pyntbit bha ia lade naduh ki 22 snem ba la dep bad uba la ju ryngkoh haduh palat 100 sien na ki jaka ba kynjang u dei u nongshong shnong ka Ravangla kaba hap hapoh Namchi district ha ka thain shathie ka Sikkim.
U Lhagyal u dang pynlong ka jingkilan met ha ki bynta khappud ka India China hynnin ka sngi ba Ar hadien ba kane ka jingjia ba sngewsih kala wan jia.Ia ka metiap jong u hadien la lapdien noh da ki shipai bad phah ban pyndep ia ka autopsy.U Lhagyal ula iatrei ryngkat bad ka kynhun shipai Paratrooper 6 Vikas Regiment mynta lah kumba phra snem.
Katkum ki tyllong khubor shipai, u Lhagyal kumba ju long ula leit sha ki bynta khappud ka India China na ka bynta ban iashim bynta ha ka jingai jinghikai hynnin ka sngi ba Ar.Kumba ju long man la ka sngi la pynkit ia u da ka liengsuin helicopter ha ka kynjang kaba 250 phut hashwa ban pyllait ia u ba un ryngkoh sha ryngkew.
U Lhagyal la ong ba hadien ba ula ryngkoh nalor ka liengsuin bad watla u tiar uba sha ka mon jong ka parachute ula plie hynrei uba sha ka diang ula sahkut noh.Watla katta na ka liang ki bor shipai kila ong ba kane ka jingjia ka dei namar ka jingthut ia ki bynta jong ka parachute.
Ia ka metiap jong u la lapdien na ka jaka khlaw hynnin ka jan miet sngi ba Ar.Ha kaba nyngkong la pynkit ia ka met jong u shapoh ka hospital hapoh ka thain hadien ba u doktor ula pynbna ba ula dep khlad noh.
Kham hadien la pynkynriah noh ia ka met jong u shapoh North Bengal Medical College and Hospital na ka bynta ban leh ia ka post-mortem.
