Shillong, Naiwieng 22 : U MLA ka BJP bad Myntri Sorkar Bah Sanbor Shullai ula phah da ka shithi sha u Myntri Rangbah ka Assam ban pynrem jur iaka jingthombor ki pulit Assam iaki nongshong shnong ka Mukroh hynne ka step ha kaba 5 ngut ki briew kiba lui lui kila shu duh ei iala ka jingim ha ka jingshah siat pathar ha ki pukit Assam bad Forest Guard.
U Bah Shullai ula kyntu ia u Himanta Biswa Sharma ban shim da ki sienjam kiba tyngeh halor katei ka jingjia.
“Katei ka jingjia kadei ka jingpyniap pathar da ki pulit Assam bad ki pulit ka tnad Forest bad katei ka jingjia kala pynbitar iaki paidbah ha kylleng ka jylla Meghalaya” la pynpaw u Bah Sanbor.
“Katei ka jingjia bad ka jingpyndonkam palat pud iaka bor da ki pulit Assam ha ki thain khappud kala pynmih iaka jingbym shngain ia ki paidbah ka Meghalaya bad ki sngew ruh ba ka Assam ka thmu ban wan rung jubor ha u pud u sam jong ka jylla Meghalaya. Katei ka jingjia kala pynshongsyier iaki nongshong shnong kiba sah ha khappud bad ka Assam kiba long ki nongshong shnong ba pura jongka ri India” la pynpaw u Bah Sanbor ha ka shithi.
U MLA ka BJP ula pynpaw ba ki pulit Assam kim lah ban thombor ban khein iaki kum ki bar ri bad lada ka sorkar Assam ka kwah iaka jingsuk ha ka thain shatei lam mihngi bad ka dei ruh ba pyni kum u hynmen.
“Kum kitei ki jingjia iaumsnam kadei tang ka jingkhein troin iaka jylla kaba marjan. Dei ban ai iaka jingbishar kaba hok na ka bynta kito kiba la khlad noh bad na ka bynta ki nong Meghalaya kynthup iaki nongialam ka BJP, kiba kwah ba dei ban wengkam shipor bad ban kem ia kito baroh kiba donkti ha katei ka kam thombor” ula ong.
U Bah Sanbor Shullai ula ong ruh ba katei ka jingleh palat pud jongki pulit Assam pyrshah iaki mynsiem briew ba lui lui ka long kaei kaei kaba ym lah ban pdiang satia.
