Nongstoiñ, Naiwieng 22: U MLA ka Rambrai-Jyrngam Bah Kimfa S Marbaniang hynne ka sngi ba-ar, ula plie paidbah ia ka Ri-Muliang Community & Rural Development (C&RD) Block kaba dang shu pynkha thymmai da ka Sorkar Jylla.
Ia kane ka jingialang plie la pynlong ha madan jong ka Shnong Nonglang ha ka jingiadon ryngkat y MDC ka thain Bah Bajop Pyngrope, u Joint Director ka C&RD Bah JE Massaw, ki riew pawkhmat ka West Khasi Hills, ki Nongsynshar Shnong bad ki paidbah na ka thain.
Haba ai jingkren, u Bah Kimfa S Marbaniang ula ai khublei bad ïaroh ïa ka sorkar MDA, da kaba ong ba kane ka sorkar ka dei kaba kloi ban sngewthuh ïa ka jingdonkam jong ki paidbah ka thaiñ.
“Baroh shikatta ki paidbah kila shem shitom namar ki hap ban leit shaduh Mawshynrut na ka bynta ki kam ki jam. Hynrei, ka jingplie ïa kane ka Block thymmai kan long shisha ka jingkyrkhu ïa baroh ki 71 tylli ki shnong jong ka thaiñ” ula ong.
U la ong ba ka 22 tarik u Naiwieng 2022 kan dei ka sngi sah kynmaw ia ka thain namar ka jingplie ia ka Block ka ban sa wanrah shibun ki jingkylla ha ka jingim jong ki nongshongshnong ka thain.
Une u MLA ula kyntu ia u BDO uban sa shimti ïa ka kam, ba un shimkhia lem na ka bynta ka jingmyntoi jong ki paidbah nongshong shnong. Ha kajuh ka por u la khot la wer sha ki paidbah ka thaiñ, ban ïatreilang bad ka sorkar lyngba ki nongtrei jong ka Block thymmai.
Nalor kaba plie ïa ka Ri Muliang C&RD Block, u MLA ula sam ruh ïa ka skhim FOCUS bad FOCUS+, YESSS, NRLM CIF, Rabi Seeds & Bio Chemical Fertilizers. La sam ruh ïa ki Cheque sha SHGs, Cooperative Societies, ki nongri sniang nongri syiad bad kiwei ki nongïoh jingmyntoi.
Kiwei kiba la ai jingkren ha kane ka jingïalang ki long u Bah HK Thabah ADC,u Bah EM Marak u ba la mih khmat na ka Ri Muliang C&RD Block, Bah Bajop Pyngrope MDC, Bah JE Massar,Bah GH Passah BDO Ri Muliang Block bad kiwei kiwei.
