Tinsukia, Naiwieng 22 :Arngut ki briew kaba kynthup ia kawei ka longkmie kila shah pyniap hadien ba ka iingsah jong ki kala shah thombor naphang ha ka kynhun ki hati khlaw ha Tindolong marjan ka Bordubi Tea Estate kaba hap hapoh Doomdooma PS kaba la jia hynnin ka miet sngi U Blei.Ia kine ki lanot la tip kyrteng kum u Ram Tanti (42) bad ka meisan jong u ka Budni Bhumij (70 snem rta).
Katkum ki trai shnong la ong ba ka kynhun jong palat 300 tylli ki hati khlaw napoh Tarajan-Duamara forest reserve kila wan rung sha ki bynta jong ka Badlabheta/Bordubi bad pynkhihwin ha ki jaka ba marjan na ka bynta ban wan jingbam ha ka por kumba 11:30 mynmiet. Watla na ka liang ki trai shnong kila shim ia baroh ki sienjam ban pynher krad ia ki, hynrei kine ki hati kila thombor katei ka iingsah jong u Tanti.
Kane kala wan jia ruh wat hadien ba ki nongshong shnong ki dang don hapdeng ka jingsyier na ka jingshah pyniap ba dang shen jong uwei u briew uba kyrteng u Orang 26 snem rta na ka jingthombor ki hati khlaw kaba la jia dang ha ka 17 tarik mynta u bnai ha Tara TED.
Shuh shuh ki nongshong shnong kila iathuh ruh ba ka kynhun ki hati khlaw napoh ki khlaw sorkar ki ju wan rung sha ki jaka shong shnong bad wanrah shibun ki jingjulor.Nalor kata kila kynnoh ruh ba hadien katei ka jingjia ha Tara TED, ki nongshong shnong kila pyntip sha ka tnat forest hynrei kim shym la shim ia kino kino ki sienjam. Kumta ruh tang hapoh ka shitaiew kila don haduh laingut ki mynsiem briew kiba la deuh noh na ka jingwan hiar thma jong ki hati ha kane ka juh ka jaka.
