Aizawl, Naiwieng 22 : Ha kawei pat ka jingjia jong ki kam buhai shnong, kila don haduh palat 250 ngut ki briew na ka ri Bangladesh kiba la wan rung shapoh ka jylla Mizoram ban shong riehtngen hynnin ka sngi U Blei.
Katkum u heh sorkar la ong ba kine ki briew kiba dei na ka jaidbynriew Kuki-Chin-Mizo kila phet krad noh na katei ka ri ba marjan namar ka jingialeh hapdeng ki shipai ka Bangladesh Rapid Action Battalion (RAB) bad ki riewkieng atiar ka kynhun Kuki-Chin National Army (KNA).Kine ki bar ri kila wan rung sha u pud u sam jong ka India lyngba ka shnong Siminasora kaba hap hapoh Lawngtlai District ka Mizoram.
Napdeng baroh ki jaka khappud jong ka ri, ka Mizoram ka don ia ki jaka khappud kaba ha ka jingjngai kaba 318 kilomitar bad ka Bangladesh.
Utei u heh sorkar u bym kwah pynpaw kyrteng ula ong ba baroh kine ki briew kiba wan wad jaka riehtngen ha Mizoram ki don 274 ngut, ha kaba tang ki longkmie bad ki khynnah ki don kumba 125 ngut.
Katkum ki jingtip ba la ioh, na ka liang ki bor sorkar ka Lawngtlai District bad katto katne ki kynhun seng bhalang ki bym don jingiadei bad ka sorkar kila pynioh ia ki lad jingiarap sha kine ki briew.
Lah ban kdew hangne ba ka Kuki-Chin National Army ka dei ka kynhun kieng atiar kaba hap hapoh ka jingkhmih jong ka Kuki-Chin National Front lane ka KNF.Kane ka dei ruh ka dei ruh ka kynhun sain hima kaba don ia ki dkhot jong ka kynhun nongshong shnong jong ki Kuki-Chin-Mizo kiba don hapoh Bangladesh. Napdeng kiba bun ki jingdawa jong ki, ka jingdawa ban ioh la ka jong ka ri bad ki kam shongshngain hapoh Bangladesh ki dei ki mat kiba hakhmat eh.
Ha kawei pat ka bynta, ka seng Zo Reunification Organisation (ZORO) kaba ialeh ban pyniatylli hapdeng ki nongshong shnong kiba dei ki jaidbynriew Chin-Kuki-Mizo kiba shong ba sah ha India, Myanmar bad Bangladesh kala pynrem jur ha kaba iadei bad katei ka kam iaumsnam.
Da kaba kynthoh tyngeh pyrshah ia ki shipai ka Bangladesh, ka Zo Reunification Organisation kala ong ba kila poi sha ka jingiamynjur bad ka kynhun shipai Arakan Army ka Myanmar na ka bynta ban khynra bad thombor pyrshah ia ka kynhun Kuki-Chin National Army.
Ha ka jingthoh ba la pyllait da ka ZORO, kala kam ba ki shipai Rapid Action Battalion ka Basngladesh ha ryngkat ki shipai ka Arakan Army kila pynlong ka jingthombor ha ki shnong ki thaw hapoh Chaihkhiang lem bad kiwei pat ki thain ba marjan naduh kane ka taiew ba la lah bad rahbor ruh ia 9 ngut ki riew paidbah napoh ki shnong.
Ha kawei pat ka bynta, na ka liang ka kynhun seng bhalang ba pawkhmat ka Mizoram ka Mizo Students’ Union (MSU) kala kyntu ia ki shipai Border Security Force (BSF) kiba iada ia ki jaka khappud ba kin pyllait ia ki phetwir ba kin wan rung shapoh Mizoram.
