Shillong,Naiwieng 21: Ka MCIC 19th South Shillong ryngkat ka jingiatreilang bad ka Jhalupara Village Council, Shillong Cantonment Development Committee bad Shillong Cantonment Lease Holders Association, haka sngi u Blei kila plie iaka Greenery Children Park, Badminton Court, Basketball Court, Cricket & Football Play Ground.
Ia katei ka park bad ki jaka ialehkai la plie da u Bah Sanbor Shullai uba long u MLA bad u Myntri ka sorkar jylla ha ryngkat ka jingdonlang ki nongialam jong ki Committee, ki nonghikai, khynnah skul, ki kynhun trei mon sngewbha bad ki nongshong shnong ka Greater Jhalupara Area.
U Bah Sanbor Shullai ula ai iaka jaka ialehkai kaba nyngong eh iaka Jhalupara Cantonment da ka jingplie ia artylli ki jaka ialehkai-kawei ka jaka ialehkai Basketball bad ka jaka ialehkai Football bad Cricket kynthup iaka Children Greenery Park.
Nalor kane ula pynshna ruh iaka jaka shong jingialang bad ka jaka shet jong ka Jhalupara Community Hall.
Ha katei ka prokram la wan ban iashimbynta ruh da u Mohan Limbu, Headman ka Jhalupara Village Council, u President ka BJP Meghalaya Bah Ernest Mawrie bad kiwei kiwei.
Ia kitei ki project la shna ha ka jaka kaba la ai da ka Shillong Cantonment Board bad watla kila don ki jingeh ha kaba nyngkong, hynrei khatduh khatwai la lah ban pyntreikam pura ia katei ka project lyngba ka jingbei tyngka jong ka sorkar jylla bad sorkar pdeng.
Ka Jhalupara Village Council, Shillong Cantonment Development Committee bad Lease Holder Association kila ai khublei ia u MLA uba la shimkhia ban pynurlong iaka jingangnud jong kiba bun bad kila tyrwa ruh ban ai kyrteng ia ka madan ialehkai da ka Sanbor Shullai Play Ground.
Ki nongshong shnong ka Jhalupara kila sngew ruh ba kadei ka histori iaki khamtam haba kila ioh iaka madan ialehkai hadien 50 snem ba ka jylla Meghalaya kala ioh iala ka jong ka jylla.
U Bah Sanbor ula ai khublei iaka Shillong Cantonment Board kaba la ai iaka jingiatreilang bad ka sorkar jylla ha kaban pyntreikam ia katei ka scheme khamtam haba katei ka jaka ha ki por kiba la leit kadei ka jaka kaba sah ki briew kiba duk, ka jaka bret nuit, ka ktem jong ki kam sniew bad mynta kala kylla long ka madan ialehkai na ka bynta ki khynnah, ki samla pule bad ki nongialehkai bad kaban pynkylla ruh iaka jingmut jingpyrkhat jong ki samla ba kin kiar na ki kam sniew.
