Shillong, Naiwieng 20 : U National President ka National Peoples Party (NPP) bad Myntri Rangbah ka Jylla Conrad Kongkal Sangma ula ong ba ka Liang Pyrshah All India Trinamool Congress (AITC) kala tei Iingsyiem ha suin namar kim pat long kiba kloi ban mynjur ia ka jingshisha ba kan dang shim por ia ki ban pdiang ha Meghalaya bad ha kiwei ki Jylla ka thain Shatei Lam Mihngi.
U Conrad ula ong ba ka kam sain pyrthei ha ka thain Shatei Lam Mihngi bad khamtam ha Meghalaya ha kane ka jinglong jingman ba mynta, ka TMC ka dei ka party kaba dang shu wan rung khlieh watla kila don ki khep ba kila wan kham mynshuwa hynrei ki khlem neh bad kim shym lalah ban pynkhlain ia ka party.
“Namar kata, wat mynta ha kane ka elekshon MLA ban wan, kane ka party kam pat dei kaba pdiang kumba ki pyrkhat bad kane ka party (AITC) kan dang shimpor bha ban pynkhlain ialade” ong u Conrad.
Haba pynpaw ba ki Nongialam ka AITC ki dei ban pdiang ia ka jingshisha bad ban peit nyngkong eh haei ba ki ieng, u Conrad ula ong “Kano kano ka seng ka donkam ban pdiang shuwa haei ba ka ieng ba kan lah pynjanai ialade bad ong peit ngi donkam ban leh ia kane ia katai bad ban pynkhlain ialade”.
Ula ong “Hynrei ka jingtei iingsyiem ha suin ka pyni ba kim tip ia kaei ka jingshisha bad ba kim shym la lah ban pynkhlain ia ka seng kat kumka jingkwah jong ki bad namar kata, ngam tharai ba ka jingkren jong ki nongialam kan don ia ka nongrim”.
U Myntri Rangbah ula kynthoh ia kane halor ka jingkam jong ka AITC ba kan sa thaw ia ka Sorkar ba thymmai ha Meghalaya.
Haba pynpaw ba ka Liang Pyrshah ha Meghalaya ka dei kaba iapait iapra, u Conrad ula ong ba ka Congress ka don 17 ngut ki MLA hynrei ka Congress kala pait la pra ha ki ar bynta bad nangne kala mih na TMC.
“Ta ka daw ka Liang Pyrshah ka dei kaba iapait iapra lypa. Ka jingshaniah jong u paidbah kala long artatien mynta ia ka Liang Pyrshah khamtam ba kam don ka jingiatylli bad ha ka jingmut jingpyrkhat u paidbah hi ka long ba hato ka Liang Pyrshah ka lah ban treibha ne em namar ka jingiapait iapra” ula ong.
Haba kynnoh ba ka TMC kala nang iapait sa shi bynta hapdeng jong ki, une u Nongialam ka NPP ula ong “Bun ngut ki MLA ka TMC kin sa leit iasoh noh bad ka NPP lane sha kiwei ki Party. Kane kan sa jia shen bad ngam kwah satia ban kren mynta”.
“Ka TMC kan sa nang pra nang pra. Ngam tip la kane ka dei ka dak ia ki ba kin nang khlain lane ba kin nang tlot..nga ieh ha phi ban rai bad ki paidbah ba kin rai” ong u Conrad.
U Conrad ula pynkut ba um kwah ban khein sting satia ia ki nongialeh pyrshah bad ong “Kum u Nong ialam seng sain pyrthei bad President jong ka Party bad kum u Myntri Rangbah ka Jylla, nga ju iai ong ban gam ju khein sting ia ka Liang Pyrshah. Ngam ju khein sting ia ki Nongialeh pyrshah bad nga ju neit ruh bah aba ngi ialeh, ngi hap ban leh bha kat kaba lah”.
