Shillong, Naiwieng 20: U MLA ka Mawphlang konstitwensi u bah Eugeneson Lyngdoh Mawphlang ha ka jingdon lang u MDC u bah Lamphrang Blah ki la pyllait ia ar tylli ki kot Khasi ‘Thylliej Ksiar na ka bynta ba Nongkong ki Phawar’ bad ka ‘Thylliej Ksiar bynta ba-ar jong ki Poetry Na La Ri’ bad kine ki kot kidei ba la thoh da u bah Pynshailang Lyngdoh Mawphlang.
Haba kren ha kane ka sngi, u MLA ka Mawphlang u bah Eugenson Lyngdoh u la ai ka jingkitbok ia u bah Pynshailang namar udei u briew ym tang ba u don tang kawei ka sap hynrei u don bun bynta ka sap ba la ai kyrpang da u Blei.
U bah Eugene u la ong kaei kaei ka sap kaba u khun bynriew u don kadei ka jingtrei shitom ban ym ailad ha ka jingjaituh, hynrei napdeng kitei ki sap ba u bah Pynshailang u don, ka ba kham sngewtynnad kadei ka sap thoh kot.
“Lada ngi pule iaki kot, kin ai ka jingnang jingstad bad ka jingshemphang kaba pura bad kum ka jaitbynriew kaba rit paid, ngi donkam ban ia ai mynsiem bad ban ia kyntiew markylliang ym ban ia bein” la ong u bah Eugene.
Naka liang u bah Pynshailang u la ong watla ka jylla Meghalaya kala kynjoh sha u mawmer ba 50 snem hynrei ka jylla ka dang ia ksaid ban pynbeit ia u pud u sam namar kam pat skhem bad ha ka kot thylliej Ksiar bynta baar jong ki poetry Na La Ri la thoh ia ka jingkha jong ka jylla naduh ba ioh kyrteng Meghalaya.
